Tamdint n Tizi Uzzu, s umata tesfugel amulli wis 37 n tefsut n yimaziɣen, d umulli wis 16 n tefsut taberkant, aṭas n yidisan i d-iheggan ahilen i lmend n usmekti-agi.
Yella-d usfgel-is ula deg tuddar, amedya n taddart n Tḥanut i d-ismeknan imulliyen-agi ass-nni n sem yezrin 28 deg waggur-agi iɛeddan. Yebda leqdic s 10h00 n ssbaḥ deg uxxam n yilmeẓyen «Yerkal Mohamed» n taddart-agi yellan deg Uwrir. Bdan yilmeẓyen n taddart-agi ahil-nsen seg 10h00 n tssebḥit s temsiken n tfelwitin n teklut d usuneɣ n Massa Hanane Messadane. Tella diɣen temsikent n yidlisen n tmaziɣt, tella-d diɣ tin n yiḍrisen d tmeddurin n waṭas n yimura imeqqranen n tmurt-nneɣ, yecban : Lmulud At Mɛemmer, Mulud Ferɛun, Kateb Yacine, Belaid Ait Ali…d wiyaḍ-nniḍen. Tella-d daɣen temsikent n tgella n taqburt n Leqbayel : seksu, berkukes, lexfaf, lmsemen…atg. Syin akkin, llan-d kraḍ n yisaragen s tutlayt n tmaziɣt, sɣur kraḍ n yimsragen n taddart-agi n Tḥanut. Yezwer-d Mass Abderrahane Kasdi, imeslay-d s umata ɣef umezruy n tutlayin. Syin imeslay-d Mass Adaoun Abdelghani, s wuzzig ɣef tutlayt n tmaziɣt d wayen akk icudden ɣur-s. Ma d asarag aneggaru i yexdem Mass Zaif Salah, yeww-id awal deg-s ɣef wawal deg tutlayt n tmaziɣt, d wazal-is deg teywelt d umeslay. Γer taggara n leqdic-agi, tella-d yiwet n qqaɛet n umennuɣ gar yinaddalen n n waddal n lkarati n taddart n At Brahem.
Ghani Amazigh