Gar-aneɣ kan kra n wussan segmi i d-yeffeɣ udlis amaynut n umeɣnas ilemẓi Akli Muhubi. Mmi-s n Bgayet i d-ilulen deg Uweqqas, taddart n Iɣil Wiss. Yejmeɛ-d semmus n tmucuha n Wat zik, yessamed-d yis-sent adlis-is amezwaru iɣef yeqdec s lebɣi ameqqran seg wacḥal-aya. D taktabt iwumi iga tazwart umeɣnas amaru Mass Nasir Meǧdub. Ma d tawlaft n tduli, texdem-as-t-id tnaẓurt Massa Ɛisu Ɛica. Dɣa, imi adlis-nni deg-s tiqsiḍin n zzman aqbur i d-snulfan yimezwura-nneɣ, yefren umaru amedyaz, ad as-yefk azwel « Timuɛay, seg tgemmi taqbaylit », imi d win i iwala iwulem-as s waṭas. Yuɣ lḥal, ameskar yella u mazal-it ar ass-a, d aneɣmas s tutlayt tamɛemrit. Daymi yerna sɣur-s cwiṭ i tmucha i d-yejmeɛ, imi yekseb tamussni d termit deg usenfali d ucebbeḥ n tira n umeslay. « Umreɣ mi d-ssufɣeɣ adlis-iw, imi nekk iswi-inu d aḥraz n ubruy amecṭuḥ seg ugerruj anesbaɣur n tgemmi-nneɣ ». I aɣ-d-yenna umeskar Akli Muhubi. Adlis-a amaynut, yettnuzu 200 n yidinaren. Zemren ad t-afen yimeɣriyen deg kra n tnedlisin di Bgayet, Aweqqas, Tubiret. Ad yili ula deg yidigan-nniḍen deg wussan i d-iteddun. Ad as-nini i Wakli afud igerrzen. Nessaram timuɛay i d-tessufɣeḍ ad d-fken lfayda i tsuta n wass-a d tin n uzekka. Imi, ɣas yelha mi yettɣimay wayen ḥerrzent tewriqin, maca ilaq daɣen ad ilin wid ara t-yeɣren.
Kaisa Khalifi