Iḍelli n lhed 04 seg waggur n yunyu2017, tasebḥhit n wass i bdan yinelmaden n uswir wis rebɛa, akayad-nsen n taggara n uswir n ulmud alemmas, yettwasnnen s yisem n BEM. Akayad-agi d win ara d-yilin ɣef teɣzi n tlata wussan, imi yebda iḍelli 04 yunyu ad ifak azekka 06 deg waggur-agi ideg nella. Mebɛed mi i yetturaǧu ad t-sɛeddin wazal n 13799 n yinelmaden, gar-asen 6550 d arrac akked 7239 d tullas, ad xedmen ikayaden-agi deg 50 n yiɣerbazen ilemmasen. Ad ten-ɛasen wazal n 2779 n yiselmaden, llan ugar n 12996 n yinelmaden ara yesɛeddin akayad n tmaziɣt. Ma d win n taggara n uswir n tsenawit neɣ ayen iwumi qqaren BAC ara d-yilin gar 11 ar 14 deg waggur n yunyu, yetturaǧu ad t-sɛeddin wazal n 20955 n yisnawiyen, gar-asen 8754 d arrac ma d 12201 d tullas. Ad xedmen akayad-agi deg 70 n wulmisen n yikayaden, ad ten-ɛasen wazal n 4958 n yiselmaden. Ilaq ad d-nini belli wigi ijerden iman-nsen ɣer ukayad n BAC, llan deg-sen 14900 d inelmaden iɣurbizen (yeqqaren deg tesnawit), llan wazal n 6055 n yinelmaden imunan. Ma d ikayaden n waddal ama d win BEM neɣ d win BAC, yuɣ lḥal sεeddan-ten yinelmaden deg yiɣerbazen-nsen am useggas iεeddan.
Ghani Amazigh