I lmen-d n wass agraɣlan n ugrud i d-yettuɣalen yal amenzu n yunyu, ihegga-d yiwen uɣerbaz n temdint n Tizi Uzzu yiwen n wahil i lmendad n warrac anda llant-d tizeɣwa n wuraren i icudden ɣer usexdem n wallaɣ, tizeɣwa n wunnɣ, akken daɣen i fkan amur i unecraḥ d taḍsa. Aɣerbaz-a, d yiwen uɣerbaz amezwaru deg Tizi Uzzu anda selmaden i yigerdan i wakken ad sɛun tabɣest deg yiman-nsen, akken ad qablen timetti, imi sewjaden-ten i tudert anda ttaɛraḍen ad ẓẓun deg ugrud tiktiwn ibennun akken ad nɣent tid yetthudun. Nesteqsa anemhal i yellan ɣef uqerru-s, yenna-d : “igerdan d nutni i d tafat n uzekka, ilaq ad ten-nɛawen, ad walin abrid, d nekni ara sen-ineǧǧren abrid, nutni ad t-ḍefren, ladɣa igerdan yesɛan iɣeblan. Nekni nessefham-asen d akken lewɛara n tɣawsa d ayen i as-yettaken azal d ayen i as-yettaken tiẓedt i wayen akken i nexdem imi nessaweḍ ɣer yiswi i nebɣa “, yerna-d deg wawal-is :” i wakken ad nessiweḍ ɣer yigemmaḍ yessefraḥen, ilaq ad nessexdem urar deg uselmed, akka agrud neɣ anelmad yetturar yettelmad s lebɣi-is, imi nettwali aṭas n yigerdan ur nḥemmel ara aɣerbaz. Smenyifen urar, ihi uqbel ad ten-nḥettem i wakken ad iruḥ ɣer uɣerbaz, ilaq ad d-nexleq deg-s tabɣest akken ad iḥemmel ayen akken ixeddem.
S. Yamani