Tanmehla n yidles n lwilaya n Tizi Uzzu, akked Tiddukkla Tadelsant Tamkadbut, s tallelt n Usqamu aɣerfan aɣiwan n Ait Bouaddou, Asqamu aɣerfan aɣiwan, Axxam n umezgun amniḍan Kateb Yacine, suddsen-d timlilit tis tẓa (09) n tfaska n umezgun n udrar, i d-yettilin deg wussan-agi. Tebda ass-nni n lǧemɛa 16 yunyu, ad tdum alamma d ass n lexmis 23 seg waggur-agi n yunyu ideg nella. Tettili-d temlilit-agi deg tezrigt-is tis 09 deg Tzeqqa n yidles n Tamkadbut, n Ait Bouaddou, deg lwilaya n Tizi Uzzu. D tazrigt i xedmen tikkelt-agi d tajemilt i sin wudmawen yettwassnen deg umezgun, wigi d: Sami Allam (yettwasnen s yisem n Bergaz) akked Ouabdesslam Fadhila (yettwassnen s yisem n Nna Zaazi). Ttiεad-agi, yebda s wudem unsib ass-nni n lǧemɛa yezrin16/06/2017 ɣef 22h00, s yiwet n terbeɛt n ccna i yessuznen akk imferǧen-nni akken ma llan. Tella-d diɣ, tɣuri n tmedyazt sɣur kra n yimedyzen. Ɣef 23h00, yella-d usenεet n tceqquft n umezgun tamezwarut “Yenna-iyi baba”, sɣur tarbaεt Macahu. Ma deg wass-nni n sed 17 deg yunyu 2017 ɣef 22h00, tella-d turart n tceqquft tis snat, s uzwel “Jugurta” sɣur Tiddukkla tadelsant Tigejdit n LNI. Ma d deg wass wis kraḍ d wis ukkuẓ, tella-d turart n 3 n tceqqufin timezgunin. Ass-nni lḥed 18 deg yunyu 2017, ɣef 22h00 uraren-d taceqquft-nni “Ṭaṭa Baṭaṭi”, sɣur tarbaɛt n Iferhounene. Snat-nni-nniḍen ad d- ilint ass-agi n letnayen 19 deg waggur-agi ideg nella, tina n 22h30 isem-is “Tawrent n tiiḥerci” telɛeb-itt-id terbaɛt n Yakourène, tina n 23h00 isem-is “Targit umaziɣ”. Ma deg wass wis semmus d wis seddis, ad d-tili turart n 4 n tceqqufin-nniḍen timezgunin, snat i yal ass. Azekka n ttlata 20 deg yunyu 2017, ɣef 22h00 ad uraren taceqquft-nni “Hassan amaggad”, sɣur Tiddukkla tadelsant Tala n (LNI), syin akin ɣef 23h00 ad d-ternu tceqquft-nni iwumi semman “Aḥiṭus”, sɣur Uxxam n umezgun amniḍan Kateb Yacine. Snat-nni-nniḍen ad d-ilin-d selazekka n larebɛa 21 deg waggur-agi ideg nella, tina n 22h00 isem-is “Bu tfuset ” ad tt-id-urar Tiddukkla tadelsant Noumidia n Oran, tina n 23h00 isem-is “Aɣerbaz”, ad tt-id-urar Tiddukkla tadelsant Imɣi n Iferhounene. Ma d as n lexmis, ad d-yili usenɛet n snat n tceqqufin n umezgun tineggura deg temsizzelt-agi. Tamezwarut d tina n 22h00, iwumi fkan azwel “Tagelda”, ara d-turar Tiddukkla Tigemmi n Tifrit n Bgayet, syin ɣer-s tis snat ad d-tili ɣef 23h00, isem-is “Seg wasmi ur tefri ara”, ad tt-id-turar Tiddukkla tadelsant Tagmat n Ait Ouaneche Ma d ass aneggaru 23 deg yunyu 2017, ad d-tili tukci n yigerdasen n usebɣes i wid yettekkin deg temlilit-agi tis 13, am wakken daɣen ara fken arrazen i tlala tceqqufin i d-yufraren, akked d tmeɣra n taggara si 21h30 d asawen.
Ghani Amazigh