Lebni n usebdad i 26 yimeɣras di Thanouts

Partager

Am yal taɣiwant seg tɣiwanin n lwilayat akk n tmurt, ssmektayent-d ass n 5 seg waggur n yulyu n 1962. Seg wass-nni ara ass-a, 55 n yiseggasen i yezrin ɣef wasmi tensa tmes n ṭṭrad mucaεen deg ddunit.

Yal aseggas di yal tama n tmurt yettili-d usmekti n wass-a n 5 yulyu, yeεzizen aṭas ɣer ugdud azzayri, yerna yesεa azal d umezruy meqqren deg Tegrawla Tazzayrit 1954-1962. I lmend n umuli wis 59 n wass n timunent, ad d- yili usmekti-ines deg taddart n Tahanouts, yettabaɛen ɣer tɣiwant n Ait Aissa Mimoun deg lwilaya n Tizi Uzzu. Imi sbedden deg tlemmast n taddart-agi, tama n ubrid ameqqran, yiwen n usebdad ideg rran tajmilt i 26 n yimeɣrasen n 4 n tuddar (Ighil Bouchene, Thaguemount, Tahanout, Ait Khalfats). Yesqam-d lebni n usebdad-agi 08 n yimelyan n ddinar, mebla idrimen n tulya-s tunṣit ara d-yilin ass n lǧemɛa 07 yulyu 2017, imi yella-d usṭarḍaq n snat n lbumbat deg 07 yulyu 1956. Uran deg-s 15 n yimeɣrasen n taddart n Tahanouts gar-asen 4 n twacult Hacemi d 5 n twacult Oudiai. Akked sin n yimejuḥad-nniḍen n Thaguemount. Ma deg Ait Khalfats uran 8 n yimeɣrasen, 4 seg twacult n Moussaoui, d ukuẓ n twaculin-nniḍen. Ma taddart deg Ighil Bouchene, uran yiwen, wagi Nessah Ali. Bdan lecɣal n usenfar-agi deg waggur n duǧamber 2016 deg taggara n waggur maggu i kfan lxudma deg-s. Ayen yessefraḥen deg wannect-agi, imi s yidrimen n yimezdaɣ n taddart-agi d tuddar i d as-id-yezzin i swayes tettwaxdam. Yella-d ujmaɛ n yidrimen snat n tikkal. Tikkelt tamezwarut i wakken ad d-sṣiwḍen azal swayes ara bdun lebni-ines, ma d tikkelt tis snat i ujmaɛ n yidrimen n tulya tunṣibt. Ma d ahil yetturaǧun, ad d-yili ass n sem i d-iteddun, ad d-yili akka: tasebḥit n wass ad d-tili tulya tunṣibt n usebdad-agi n 26 n ccuhada, syin d asersi n snat n tmeqqunin n yijeǧǧigen ɣef lerwaḥ n ccuhada-agi akked rruḥ n yilemẓi Zaif Mohammed i iruḥen d asfel deg tefsut taberkant. Syin ɣur-s, ad d-yili umeslay sɣur yimjuhad i d-yecfan i umezruy n taddart-agi u ɣef tudert n ccuhada-agi. Ma ɣef 12h00 d asawen, ad d-tili lwaɛda n seksu s uksum i wid yellan akk din. Ɣer taggara maḍi, ad d-tili terbaɛt n yiḍebbalen, ara d-yawin kra n tezlatin imi d lferḥ u d tameɣra n taddart merra. Ma ɣef leqdic-a, yenna-d uselway n tesqamut n taddart Mass Mohammed Oumaiouf: “ Ad d-nesmekti ass n timunent am nekkni am tuddar-nniḍen, ideg nga yiwen n usebdad i 26 n ccuhada n 4 n tudrin i d-nebder yakan. Nefreḥ aṭas imi nessaweḍ ad asen-nerr tajmilt i ccuhada n taddart-nneɣ d tuddar i d aɣ-d-izzin s ttawilat-nneɣ nekni s yimezdaɣ n tuddar-agi, acku tura la nettwali belli aṭas n yilemẓyen ur neẓri ara amezruy n tmurt-nneɣ. Ilaq fell-aɣ nekni s yimeqqranen, ad asen-nales amezruy n tmurt d win n tmurt n Leqbayel. Ula deg taddart, aṭas ur neẓri ara acu yeḍran dagi deg tegrawla tazzayrit, dɣa ad nfares tagnit-agi i wakken ad d-nemmeslay ɣef wazal tesɛa taddart-agi n Tahanouts deg ṭṭrad n tmurt-nneɣ”.

Adaoun Abdelghani

Partager