Yessufeɣ-d ussan-a iɛeddan unaẓur Muḥend Ayt Ceɛlal aḍebsi n ccna amaynut wis 6 deg umecwar-is n tẓuri, s uzwel n « Lɣaci i yenfa listiqlal ». Deg sa (7) n tezlatin i d-yeddan deg-s, ad naf yezzi-d ucennay ɣef waṭas n tlufa i t-iceɣben netta d amezwaru, i iceɣben daɣen timetti tazwawt d ugdud s umata. Tilufa-a, rzant liḥala n tmurt, tin n tudert, lɣerba akked ddunit. Akken i d-usan yismawen n tezlatin, ad naf « Lɣaci i yenfa listiqlal », « Yelli », « A wi iruḥen », « Tasusmi », « Ccetwa n leɛrur », « Aḥeq nekk » akked « Nfiɣ am lefḥel ». Deg tuɣac i yellan deg tezlatin tedda-d tin n tcennayt Nasira Mesbaḥ. « Kkiɣ aseggas akken kfiɣ asekles n uḍebsi-a amaynut. Wid ukud nwiɣ ad xedmeɣ, ur llin heggan merra-nsen. Rnu-as tamettant n gma-s n Nasira Mesbaḥ ayyuren iɛeddan. Aya iḥettem-d fell-aɣ ad nerǧu azal n 4 n wayyuren ». D awal n Ayt Ceɛlal mi t-nesteqsa ɣef tegnatin n usekles. Ma ɣef taluft n tuffɣa n umaynut-a-ines d tnezzut-is yenna-aɣ-d mmi-s n Tuǧa: « Ar tura yella walbum-a deg tɣerɣar n uzdam deg Internet, am iTunes, d Amazon. Ma deg tmurt, ulac amaẓrag i yi-d-yessawlen. Ulamma ur ḥebbreɣ ara ula d nekk ad afeɣ, imi beɛdeɣ ɣef wayen iḍerrun deg taɣult-a dinna ». Akkem yesnum i wid i t-iḥemmlen, yewwi-d Muḥend Ayt Ceɛlal amaynut ama seg tama n yimeslayen neɣ seg tin n uẓawan. Ɣas ahat mačči aṭas n wallalen i yettwasqedcen, meɛna s uqeɛɛed yelhan, tban-d tezmert n uẓawan ma yeddukkel d wawal iweznen.
M. K.