Tberreḥ-d ussan-agi iɛeddan tneɣlaft n usegmi aɣelnaw Mass Benghabrit Nouria, belli ad tili tegnit tis snat i uɛiwed n ukayad n taggara n uswir n tesnawit, yettwassnen s yisem n BAC, si 13 ar 17 yulyu 2017. Leḥsab n wid ur nesɛeddi ara yugar 70 000 n yisnawiyen deg 48 n lwilayat n tmurt, d lwilaya n Lezzayer tamaneɣt ideg yella wuṭṭun ameqqran deg wid izeglen akayad-agi, imi llan 1248 n yinelmaden i ixedmen agellel (retard), deg-sen 782 n yinelmaden d iɣurbizen, ma d 466 d imjerden imunan (ileliyen). Ma d lwilaya n Tamenraset i yellan deg “lqern n ddunit”, yerna yeḥma lḥal ala 21n yinelmaden i t-izeglen, 9 deg-sen d iɣurbizen ma d wiyaḍ d imunan. Takti-agi, tusa-d mebɛed mi yessuter uselway n Tegduda Mass Abdelaziz Bouteflika deg tneɣlaft n Usegmi aɣelnaw Massa Benghabrit, nettat si tama-s tennad-d ihi, imi aseggas-agi ma tezgel ddqiqa ɣef tsaɛet n ukayad, ur ikeccem ara unelmad-nni, ulamma deg lqanun n yikayaden tella nnefṣ n ssaɛa d azref-is ad d-yekcem uqbel-is, ma d tura ksen-tt ɣef ssebba n tufɣa n yisental n yikayaden-agi. Ad d-nsemkti, belli d tikkelt tis snat ara d-tili tegnit tuzzigt i yinelmaden n ukayad n BAC seg yiseggasen 2000 ar ass-agi, imi tella-d yakkan deg useggas n 2001, ussan-nni n Tefsut taberkant, imi aṭas ur nesɛeddi ara tikkelt-nni deg tmurt n Leqbayel.
Ghani Amazigh