Segmi tbeddel Algérie Télécom i tsumar-is (offres) n Internet n 4G LTE seg tuqqna idummen ɣer tin iḥebbsen, uɣalen yimezdaɣ n twilayt n Bgayet ḥaren ɣef ubrid ara ḍefren akken ad keccmen ɣer umaḍal-a uhlis. Ulamma wid izedɣen timdinin ur ḥulfan s waṭas n temḍerrit skud sɛan tiferni n ADSL, wid n yidurar, ufan iman-nsen nnḍen deg uɣilif. Imi tasuta n tallit-a i nettidir teqqen merra-s ɣer Internet. Deffir waya, yuɣ lḥal, ddeqs n tiɣriwin i d-yeffɣen sɣur tdukkliwin d tuddsiwin i ubeṭṭel n tuqqna-a alama i d-subbent sswami-s xersum. Ladɣa ɣef uẓawali i yesɛan azref ad yeqqen s ttawil-is am netta am wiyeḍ. Ula d tineggiwin (agences), rwant asiwel d uccekti sɣur yimsaɣen. « D ayen ur nedmi maḍi ad d-yili, imi mačči ɣef waya i nestenya ass n tiɣin. Ttwaliɣ ccɣel-a d attɛeddi ɣef yizerfan n umsaɣ d umsider s umata ». Akka i aɣ-d-yenna yiwen n useqdac aqbur n 4G LTE. Ar tura, ilaq ad d-nini amur ameqqran seg yimsaɣen, ǧǧan ttawil-a n 4G LTE ɣef ssebba n leɣla. Ladɣa imi xilla i yellan ssaramen deg 4G voLTE tamaynut, meɛna ula d nettat yewweḍ lqidar n unnezdi (abonnement) amayyur ɣer 3500 n yidinaren. Ulamma telḥa cwiṭ ɣef yiɣarimen Tdukkla Taɣelnawt n Uḥuddu ɣef Yimsidren (consomateurs), maca ur yefri ubeddel i d-yellan, skud tuqqna tḥebbes mi ara kfun 8 n yijigaten. Ɣef waya, mazal tettkemmil taluft gar Algérie Télécom d yimsaɣen-is, ma neẓra ineggura-a ur ttuqennɛen ar tura.
M. K.