Tawrirt tazeggaγt, yiwet n taddart i d-yezgan deg tγiwant n Leɛğiba tettidir aṭas n yiγeblan yerzan anegmu. Lixsas n waṭas n yisufar, yeğğa iɛeggalen n tiddukkla n taddart ad nnejmaɛen i wakken ad d-heyyin yiwen n rrabul ara ssiwḍen i yimḍebbren terza temsalt ahat ad d-afen tifrat i yiγeblan ttidiren yimezdaγ. D yiwet n tγerγert n 12 n tneqqiḍin i d-ssufγen yimeγnasen n tiddukkla anda rran tamuγli-nsen γer waman n tissit yettuneḥsaben d aγbel agejdan, syin, rnan-d taluft n trisiti ixussen s waṭas, ama d asiweḍ-is γer tnezduγin i merra, ama d aseğhed-is. Iberdan, asufeγ n waman iɛefnen, liḥala n uγerbaz amenzu d waṭas n temsal-nniḍen, yella-d fell-asent umwata s cwar n yimezdaγ n taddart. I wakken tiγri n tiddukkla ad taweḍ s anda iwulem, imezdaγ-a ssutren timlilit akked yimḍebber n ddayra i wakken ad iẓer iγeblan-a. Mebla leɛdil, yiwen n ttiɛad gar snat n tamiwin yettwaxdem, anda iɛeggalen n Tiddukkla mmeslayen d yimḍebber n ddayra anda tineqqiḍin i 12 ɛeddant deg uγerbal. Syin, d yiwen n rray i d-yeffγen anda twulem tuffγa γer unnar i tifin n tifrat i waṭas n yiγeblan. Ass n lexmis yezrin, tella-d akka yiwet n tirza anda imḍebber n ddayra yewweḍ-d s amkan anda i d-yedda yid-s uselway n tγiwant akked srabes yeɛnan aman, iberdan d waṭas n yiḥricen. Tirza-a, tebda seg uγerbaz anda i d-yellla usufeγ n rray n uɛiwed n lxedma n kra n lecγal yerzan ssqef n kra n tzeγwa ara yilin d amenzu. Inebgawen n Tewrirt Tazeggaγt kemmlen tirza-nsen γer tiγremt n taddart-a anda yettunefk lamer i uheggi n yiwen n uγawas ama i usufeγ n waman n lehwa yettarran srid γer yixxamen, neγ abeddel n yimukan i kra n yigejda n trisiti iḍurren mačči d kra d useqɛed n yizergan. Aṭas n yimukan iγef bedden yimḍebbren-a anda ddan yid-sen yiɛeggalen n tiddukkla d waṭas n yimezdaγ. Uqbel ad tekfu tirza, Mass Ait Ali, imḍebber n ddayra yewɛed imezdaγ n taddart d akken aγbel n waman n tissit d win ara yekfun i lebda imi takebbanit ara d-yelhin s usiweḍ n waman seg ubaraj n tlesdit alamma d taddart d tin ara yebdun lecγal deg yimir-a, yerna ad nili deffir-s alamma wwden waman γer yal axxam. Ma d ayen yerzan iḥricen–nniḍen, Mass Ait Ali yenna : « Ayen ara nezmer ad t-nexdem nekkni, ur yelli uγbel, ma d ayen yufraren tazmert-nne&gamma,; ad ken-weɛdeγ belli tiγri-nwen ad taweḍ s anda ilaq, d Mass lwali iwumi ara ssiwḍeγ aγbel-nwen. » Seg tama-s, Ramdane Nouri, imḍebber n tiddukkla n taddart, yenna-d : « nekkni nessaweḍ iγeblan-nneγ i yimḍebbren terza taluft, neɛreḍ i wakken ad d-negmer lixsas akk anda yella. Tura mi akka wid iγer nruḥ rzan-d s annar, ad asen-nerr tajmilt i tizwar, syin ad nili seg wid ara ibedden s anegmu n taddart-nneγ. »
M. Smail