Ad tili ussan n taggara n wayyur n ɣuct i d-iteddun

Partager

Tettheggi Tdukkla Tadelsant Adrar n Fad n tɣiwant n Ayt Smaɛel deg Bgayet i teẓrigt tis seddis n tfaska n uqennuc ansayan ara yilin ussan n taggara n wayyur n ɣuct i d-iteddun. Dɣa d tagnit akken ad tuɣal tejmilt i snat n temɣarin i aɣ-yeǧǧan taggara-a, Nna Taseɛdit d Nna Zineb, imi zgant ttbaddadent i yal tafaska n yiqennucen i d-tettheggi tdukkla. I lmend n waya, teɛna tiɣri akk tulawin n Ayt Smaɛel i iran ad kkint deg tedwilt n useggas-a, deg-s aḥraz n lɛada deg-s amennuɣ. Ilaq kan fell-asent, ad aznent ɣer uxxam n tdukkla kraḍ (3) n yiqennucen mgaraden, i yebnan s yideqqi, s wudem ansayan, send azemz-a: 15 ɣuct 2017. Tella tesqamut yessnen ara d-ifernen ayen yufraren seg wayen ixussen. Tid ara d-yufraren, ad asent-ttunefken warrazen, d asnemmer diɣ d asebɣes ɣef uwenneɛ n uqeddic n usider n tgemmi-a turtangawt. Imi seg zik n zik d tameṭṭut i yellan i lmend n uḥraz n tgemmi d yidles. « D ayen yelhan wayen i d-tettheggi tdukkla n Udrar n Fad. Aya, d ccan i yidles-nneɣ d ccan i nkenti. Ihi ilaq ad nekki s waṭas». D awal n yiwet n tmeṭṭut seg Ayt Smaɛel. Ad d-nesmekti kan d akken ar tura asihar-a adelsan, d adigan kan, maca ɣer sdat yezmer ad yebdel uẓayer-ines, ad iḥaz tilisa ibeɛden n yidurar.

M. K.

Partager