Di tezrigt-is tis 10, Tiddukkla tadelsant Amgud n tɣiwant n Draɛ El Mizan, s lemɛawna n Lsas Maɛtub Lwennas, thegga-d yiwen leqdic ass n 15 Yulyu 2017, wagi d arraz : Mɛtub Lwennas mgal tatut.
Teḍra-d temlilit-a deg uxxam n yilmeẓyen “Mensuri Arezqi”. Yebda leqdic tasebḥit n wass s yiwet n temsikent n ubrid i d-tewwi tiddukkla. Akken, daɣen, i d-sekknen kra n tewlafin n unaẓur Lwennas. A wakken i d-yella yiwen usarag anda i d-mmeslay deg-s Malika Maɛtub ɣef tɣelnaẓri (Le nationalisme) deg yisefra n Maɛtub Lewennas. Ula d tanemhalt n Ugezdu n tutlayt d yidles amaziɣ n Bgayet, Massa Linda Utaḥ i yellan, ula d nettat, gar wid yewwin arraz Matub Lwennas mgal tatut, temmeslay-d awal ɣef tiktiwin i d-yettuɣalen deg tmedyazt n unaẓur Matub. Yessuli leqdic s ufraq n warrazen i yiwudam i d-yufraren deg umsizwer, wigi d : Mass Acab Remḍan ( Anemhal n Uxxam n usiẓreg Acab) , Mass : Usalem Muḥend uɛmer : d aselmad n tdamsa , d ameɣnas , Massa Linda utaḥ : d tanemhalt n Ugezdu n tutlayt d yidles amaziɣ n Bgayet . Nesteqsa-d Anemhal n tdukla Amgud Mass Karim Lɛarbi ɣef wamek i d-tusa i tikkelt tamezwarut tikti akken ad xedmem araz-a. Yenna-d : « Deg useggas n 2007, nejmaɛen iɛeggalen n tdukla akken ad as-nerr tajmilt i Maɛtub Lwennas, syin yiwen seg yiɛeggalen, yenna-d d akken Da Lwennas d ameqqran ilaq–as ayen meqqren , s wanect-a , tlul-d tikti n warraz n Maɛtub Lwennas mgal tatut i nettak yal aseggas i yimeɣnasen d wid ixeddmen ɣef tmaziɣt d yidles-is . Ma ɣef wayen yeɛnan afus n tallelt deg umsizwer-a, yerna-d : « Aṭas n wid i d-nufa bedden-d ɣer tama-nneɣ. Ass-a, ad asen-iniɣ tanemmirt-nwen. Bɣiɣ kan ad d-rnuɣ, yiwen wawal. Aql-aɣ la d-nettheggi yiwen n usenfar-nniḍen iwumi nefka azwel Tafzimt n massinissa». Deg taggara, testeqsa Mass Said Chemakh , D amyaru , d aselmad n tutlayt n tmaziɣt di tesdawit n Mulud Mɛemmri, imi ula d netta seg yimezwura i yewwin arraz n Maɛtub Lwennas mgal tatut deg useggas n 2010, yenna-d : « Assa-a, nessaweḍ nesɛa tajerrumt n tmaziɣt, asegzawal s tmaziɣt, tura ilaq ad nessiweḍ ad nekcem di tiknulujiyin timaynutin ama d Internet, neɣ tilizri s ttawil n Internet , asiẓreg n tesɣunin d yidlisen , wigi i d annar i d aɣ-yeggunin .
Souhila Yamani