Tamezwarut lɛeslama-k a mmi ɣer fransa. Ini-yi-d kan kečč a Aɛmer, amek i t-tɛeqleḍ belli d mmi-k, kečč werǧin t-twaleḍ ? Yenna-as Aɛmer:
-A taɛzizt, anekcum d-yekcem s axxam mačči am unekcum n ubeṛṛani, ikcem-d am win ara ikecmen s axxam-nsen.
Aɛmer ijaḥ mebla lebɣi-s di Paris. Tlata n wagguren mbaɛd mi izweǧ d yelli-is n ɛemmi-s, yuɣal ɣer lɣerba. Seg wass-n, ur yezzi ɣer tmurt, tjaḥ teɣribt-is di Paris. Di tazwara, mi yuɣal si tmurt ixeddem deg ucanṭi, ibennu. Yal tlata n wagguren ad iceyyeɛ cwiṭ n yidrimen s axxam, baba-s inejmaɛen si lɣerba, ifraḥ nezzeh yis. Yewwi-tt akken azal n useggas alammi d asmi i d-yeɣli, ireẓz deg wammas. Ass-nni, d ass n lḥed, d ass n ustaɛfu, Aɛmer i wakken ad isiger cwiṭ isuṛdiyen ara d-iceyyeɛ ɣer tmurt i lɛid tameqqrant, irennu kra n tseɛtin n zyada: ixeddem ula deg wass n usteɛfu. Amɛellem ifraḥ, lxedma ad tessali, axeddam diɣen si tama-s, ad d-iḥelli cwiṭ swayes ara iqabel lmesruf n tmurt. Ass-n d asemmiḍ, agris igezzem ifassen, xas tagnawt teṣfa. Aɛmer s ufella n safuṭaj imdarkel uḍar-is, iḥlujeg, iberttex-d ɣer tmurt. Amkan ansi i d-iɣli ur tqeṭɛen-t ara wallen. Uzlen ixeddamen, ufan-t ifser ɣef waɛrur, allen berɛent s igenni, ulac ṣsut, ulac ambiwel. Nnan-as akk d ayen lamana tewweḍ bab-s. Di sbiṭaṛ mi d-yuki, mi d-yelli allen-is, yufa-d zzin-as imdanen ur yessin ara s tbentiwin ticebḥanin, iwhem kan ur izmir ad t-id-yali wawal, wala ad imbiwel, isreɛ iqqim kan. Tuẓa-d yiwet n tmejjayt ɣer-s, tezmume²g-as, tebda tettlaɛi-t. Teqqar-as : “ur ttagad aql-ak di sbiṭar gar yifassen n yimejjayen, teɣliḍ wwin-k-id ɣer da srid. Ur ttagad ad teḥluḍ. Tura ma tesselleḍ-iyi-d, smermec-d ma tzemreḍ”. Aɛmer iqqen allen-is illi-tent. Imejjayen-nni i as-idewṛen, dduqsen-d akk ferḥen. Yuẓa umejjay-nniḍen ɣer-s yenna-as : “tesɛiḍ zher, i kečč d-yeɣlin seg wanda d-teɣliḍ ulac d acu i ak-yuɣen deg uqeṛṛu. yenna-as: “Deg wagguren-agi imezwura, ur tzemreḍ ara ad tekkreḍ seg wusu, ilaq-ak usteɛfu d tujjya n yiɣsan yeṛzen. Teɣliḍ-d ɣef wammas-ik”. Allen n Aɛmer ččurent-d d imeṭṭawen…Ɣer-s iɣli-d yigenni ɣef tmurt, izder lbabur yis-s di tmurt tabeṛṛanit, iqqen allen-is, iruḥ di ttexmam weḥd-s. Xemsa n yiseggasen d alawi, sbiṭar ittak-it i wayeḍ netta yiwen ur izri s lexber-is…Yettkemmil
Ramdane Lasheb