Ihegga-d sem-a iɛeddan “Ugraw Tigawt Ilemẓiyen” yiwet n tedwilt n ubraz d usizdeg n twennaḍt deg tɣiwant n Ayt Smaɛel, i ibeɛden s wazal n 70 n yikilumitren ɣef waɣir n Bgayet. S uberriḥ n « Ayt Smaɛel, taɣiwant tezdig », iɛeggalen n tdukkla Raj n temnaḍt akked ddeqs n yimezdaɣ iwumi tehwa tekti-a, kkren-asen afus deg ufus i yiberdan d yizenqan n tnezduɣin akken ad asen-kksen neɣ ad asen-sneqsen, xersum seg yiguda i yeṭṭenḍeggaren setwaɣen lḥala. Imi akken ẓran wid yesseḥbibiren ɣef unagraw akuluji, ixuss nezzeh uwkay ɣur medden ɣef temḍerrit i tettidir twennaḍt sɣur umdan, am wakken ixuss usḥulfu daɣen. Ladɣa imi uqant tdukkliwin i yekkaten ɣef twennaḍt d tezdeg n ugama. « Nessaram ad d-ttwaheggayent tigawin am ti seg teswiɛt ɣer tayeḍ iqerben. Akken nlehhu d twennaḍt d wayen i aɣ-d-yezzin, i nlehhu d tudert-nneɣ ». I aɣ-d-yenna yiwen n umezdaɣ n Ayt Smaɛel. Ad d-nesmekti d akken tigezmi n Raj Ayt Smaɛel, tella tɣab seg unnar taggara-a, maca sidren-tt-id ussan-a kan kra n yilemẓiyen i yebɣan ad xedmen i ubaɣur n tmetti s umata.
M. K.