Amnir-iw n tmaziɣt, d yiwen udlis i d-yesuffeɣ umeddakkel-nneɣ Adaouan Abdelghani i yellan, akka tura, d aneɣmas deg Yisebtaren n Uɣmis n yimaziɣen n La Dépêche de Kabylie. Deg umnir-a, ad naf 31 n temsirin n tmaziɣt, 35 n tbadutin akked 100 n yimedyaten yerzan, ladɣa, ilugan n tutlayt. Bḍant temsirin ɣef 4 n yiḥricen : tamawalt, tajerrumt, taseftit akked tirawalt. Yal tamsirt tesɛa tabadut akked yimedyaten, ayen ara yessefsusin asegzi-ines, ama i yinelmaden n uɣerbaz neɣ n tesdawit, ama i wid-nniḍen i yebɣan ad lemden tamaziɣt. D allal, diɣ, i yinelmaden yetthegin ikayaden n BEM neɣ BAC imi xussen aṭas deg unnar yidlisen yecban wigi. Tella-d tezwert n udlis sɣur uselmad n tmaziɣt Ali Bekhti. Ilul Adaoun Abdelghani ass n 8 deg tuber 1994 deg taddart Taḥanut deg tama n Wagennun, lwilya n Tizi Uzzu. Akka tura d anelmad deg ugezdu n tmaziɣt deg tesdawit Mulud Mɛemmri n Tizi Uzzu. Yessufeɣ-d yakan, deg yiseggasen yezrin, yiwen n wammud n yinzan iwumi yefka, dɣa, isem Tala n yinzan. Azal n Umnir-a 200DA. Taɣuri igerrzen i yimeɣriyen, afud i umeskar.
Farida Elharani