Aɣmis n Yimmaziɣen: Amek tebdiḍ ccna?
Malik Kezoui: Bdiɣ ccna mačči s lebɣi, acku leɛmer ad as-niɣ nekk ad uɣaleɣ d acennay neɣ ad sefruyeɣ. Seg wasmi meẓẓiyeɣ ḥemmleɣ ad sleɣ aṭas i rradyu d wayen akk i icudden ɣer tẓuri. Qqaren-iyi-d imawlan-iw zik asmi mecṭuḥeɣ deg yiḍ ma ur sliɣ ara i uẓawan ur gganeɣ ara, acku d ayen wulfeɣ-tt, s yis-s i d-tturbbeɣ. Asmi leḥqeɣ ad ɣreɣ deg uɣerbaz n yimeɛdar yellan deg Boukhalfa, ufiɣ imeddukkal-iw llan deg-sen wid yeqqaren deg tesdawit, syin ttawin-iyi ad cnuɣ deg tmeɣriwin i d-yettilin daxel n tesdawit. Bdiɣ timeɣriwin deg tesdawiyin seg useggas n 1999, syin akkin cniɣ akked tiddukkliwin tidelsanin, syin ɣer sdat uɣaleɣ xedmeɣ aṭas n tmeɣriwin deg uxxam n yidles Lmulud At Mɛemmer n temdint n Tizi Uzzu.
Ma yella win i d ak-id-yefkan afus n tallelt?
D tidet llan wid iyi-ɛawnen deg umecwar-iw n ccna, amezwaru seg-sen d acennay-nneɣ ameqqran i ḥemmleɣ aṭas wagi d “Ahcene Ahris”, lukan mačči d netta tili ass-agi ur ttawḍeɣ ara s andaka wwḍeɣ ass-a. Imi d netta i d-isulin ɣef usayes i wakken ad cnuɣ yid-s i tikkelt tamezwarut deg 2006, yerna d tameɣra-s taneggarut i yexdem. Syin akkin d aneɣlaf n yilmeẓyen d waddal Mass Ould Ali Lhadi, yellan imiren d anemhal n uxxam n yidles Lmulud At Mɛemmer n Tizi Uzzu. Aṭas n tikkal iyi-id-yessawel i wakken ad ɣeniɣ uqbel ad d-sufɣeɣ tasfift-iw tamezwarut. Syin akkin daɣen iɛwen-iyi ucennay-nneɣ nḥemmel aṭas, wagi d Ferhat, imi timeɣriwin-is tineggura yexdem deg tmura n Leqbayel (Tizi Uzzu, Bgayet akked Tubiret), cniɣ deg-sent yid-s ɣef usayes. Mebla ma ttuɣ tameɣra taneggarut i yexdem Si Moh deg useggas n 2004, yessuli-iyi-d daɣen cniɣ yid-s.
Ma d isefra-k kan i tcennuḍ?
Tidet kan, mačči ala isefra i xeddmeɣ nekk s timmad-iw i cennuɣ deg tezlatin-iw, xeddmeɣ-d tasuqilt i kra n tikta s tutlayt n tefransist, ttaraɣ-tent-id ɣer teqbaylit d isefra. Imi daɣen nekk ttnadiɣ aṭas u ḥemmleɣ ad suqleɣ tinfaliyin n yimura imeqqranen iyi-tteɛjaben. Am wakken daɣen i cniɣ yiwet n tezlit n Taleb Rabeh.
Amek tessawḍeḍ, ad teɣreḍ wa ad tecnuḍ, yerna kečč d amuḍin?
Deg temsalt-agi, nekk liɣ mgal widak ik-yeqqaren belli aẓawan neɣ ccna tettɛewiq inelmaden ɣef lqraya-nsen. Nekk lukan mačči d ccna ur cukkeɣ ara ad ɣreɣ, lukan daɣen mačči d leqraya cukkeɣ ur cennuɣ ara. Zemreɣ ad d-iniɣ belli ta tettkemmil ta, ulac am wakken mi ara ddukklent. Nekk ttafeɣ aṭas iman-iw deg ccna, yis-s senqaseɣ ɣef wul-iw, senfalayeɣ ayen bɣiɣ…atg. Imir-nni yeɛni liɣ qqareɣ yerna cennuɣ tura akka selmadeɣ deg uɣerbaz n yimeɛdar n Boukhalfa, yerna mazal-iyi ttɣeniɣ. Ma d aṭṭan-iw d tamesalt-nniḍen akk, acku ḥemmleɣ tamussni d unadi dɣa lemdeɣ tura uɣaleɣ selmadeɣ, ula d ccna ḥemmleɣ-tt aṭas dɣa rebḥaɣ fell-as.
Ula d tamsalt n uselmed deg uɣerbaz, laɛmer xemmeɣ ɣur-s, armi i d-ufiɣ iman-iw d aselmad ur ḥtameɣ ara.
D acu n yiɛwiqen i d-tettmagareḍ deg ubrid n ccna?
Ugur amezwaru i d-ttmagareɣ nekk s timmad-iw d aṭṭan-iw, imi ulamma tura qqwan ttawilat imaynuten, maca ur nezmir ara ad nexdem kulec i yiman-nneɣ akken ilaq lḥal dima. Yerna lukan mačči d imeddukkal-iw d twacult-iyi iyi-ttɛawanen aṭas aṭas, tili ass-agi ur ttiliɣ ara gar-awen d afennan. Ma iɛwiqen i d-yettmagar ufennan s umata, imi afennan deg tmura-a ur ixeddem ara deg useggas kamel, imḍebbren ttɛassan kan tignatin akked tmeɣriwin, yecban yennayer, 20 yebrir, uḍan n remḍan…atg. Ḥesben-aɣ am tɣawsiwin melmi kan isen-yehwa ad aɣ-d-ssiwlen i wakken ad necnu, ayɣer ala ur d-ttilint ara tmeɣriwin n ccna ɣef teɣzi n useggas. Ulac daɣen imazragen d yimsuffɣen yesɛan ssaḥ. Ilaq daɣen ɣef yimdanen uzzigen ad d-gren afus-nsen, acku ddula weḥd-s ur tezmir ara i wannecat-a.
Ulamma yerna nekkni dagi deg Tizi Uzzu tanmehla n yidles txeddem ayen i wumi tezmer, lḥasun ulac tin itt-yugaren deg tmura-nneɣ deg temsalt n leqdic.
Ma tcennuḍ kan ɣef tudert-ik, neɣ ɣef wayen ttidiren wiyaḍ?
Tamezwarut, cennuɣ ɣef wayen ttidireɣ nekk deg tudert n yal ass, syin akkin sefruyeɣ ɣef wayen ttḥulfun wid yettidiren yid-i deg tmetti. Imi nettɛici deg yiwen umkan dɣa uguren-nneɣ ttemcabin ama d tayri ama d aṭṭan ama ɣef yidles-nneɣ d teqbaylit-nneɣ, acu kan cennuɣ timsal-agi akken i tent-walaɣ nekk s timmad-iw. Imi daɣen suquleɣ-d cwiṭ seg tefransit ɣer teqbaylit, iban kan ad sefruɣ wa ad cnuɣ ɣef wayen ttḥusun wiyaḍ. Cniɣ daɣen ɣef yiwen n uderɣal i yettwalin tilufa akken-nniḍen mačči akken i d tent-ttwalin tuget n yimdanen, taɣuct iwumi semmaɣ “ssemhaɣ-am”.
I kečč tettwaliḍ timsal akken itent-ttwalin medden, neɣ temxalaf tmuɣli-k fell-asen?
Deg tuget n temsal ttemgiridaɣ ɣef medden-nniḍen deg wamek i ttwaliɣ kra n tlufa n ddunit, yerna nekk uɣeɣ tannumi qqareɣ ayen ttwaliɣ ula ur yetteɛǧab ara lḥal imdanen, imi qqareɣ-tent-id akken qqariḥit, tikkwal ur ttaṭṭfeɣ ara iman-iw, ulamma ur bɣiɣ ara ad tent-id-iniɣ maca iaedda-yi lḥa mačči d lebɣi-w. Dɣa tura ttaɛraḍeɣ amek ur d-qqareɣ ara kulec ɣef wayen ttxemmimex d wayen ttwaliɣ deg tudert n yal ass, ilaq ad sawḍeɣ ur d-qqareɣ ara ayen yellan deg-i. Ulamma yeɛni ur cliɛeɣ ara deg yimdanen ur nbeɣɣu ara ayen i d-qqareɣ maca friɣ-tt d yiman-iw xas akken ẓriɣ ur zmireɣ ara ur d-qqareɣ ara kulec, maca ayen sneqsaɣ d aṭas.
Ma yella wayen txeddmeḍ berra n ccna?
Am nekk am tuget n yicennayen neɣ n yinaẓuren s umata nxeddem ayen-nniḍen, yerna mačči d ccna i xeddim n uɣrum deg tmurt-nneɣ, nennu-tt kan d zyada. Ihi uqbel ad iliɣ d aselmad n tefransist deg uɣerbaz n yimeɛdar n Boukhalfa, asmi liɣ d anelmad deg tesdawit liɣ xeddmeɣ ɣer yiwet n tezrigt i wumi qqaren “Llala Moulati”, seɣtayeɣ-asen idlisen n tmaziɣt i d-tessufuɣ s ttawil n tira n “Braille”. Gar wayen sextaɣ adlis-nni n Kateb Yacine, adlis-nni n Mouloud Feraoun, akked tmucuha i warrac imeẓyanen. Menbeɛd mi tamurt teṭṭef-itt ccedda n lexsas n yidrimen, dɣa yenna-iyi bab n tezrigin-agi nekk ad ḥebseɣ imi ulac idrimen. Dɣa seg yimiren ar tura aql-iyi-n d aselmad n tefranstist deg uɣerbaz n Boukhalfa.
Mmeslay-aɣ-d cwiṭ ɣef umecwar-ik deg ccna?
Deg ccna aql-aɣ nruḥ-as kan s ttawil, nxeddem ayen i wumi nezmer wayen kan nesɛa. Ulamma bdiɣ ccna deg useggas n 1999, maca ur d-sufɣeɣ ara tasfift alarmi d aseggas n 2010, armi ɛeddan 11 n yiseggasen n tmeɣriwin ɣef usayes i skelseɣ tasfift-iw tamezwarut, i wummi semmaɣ “Tiktabin”, ideg llant 7 n tezlatin. Tis snat giɣ-as isem “Africa”, llant deg-s 8 n tuɣac, yiwet s tefransist ma d sebɛa-nni-nniḍen s teqbaylit. D tasfift ideg cnan aṭas n yicennayen, gar-asen: Djafer Ait Mengullat, yiwen n ucennay n tmurt n Coungou, nekkini…atg. Deg useggas n 2014, rniɣ-d aḍebsi-w wis tlata, d winna i wumi fkiɣ azwel “Tamurt-iw”, llant deg-s 9 n tuɣac. D aḍebsi daɣen ideg cnan waṭas n yicennayen n tmurt n Leqbayel, yecban Rabeh Ouferhat, Karim Abranis, Malek Bachi, Nouria…atg. Syin ilindi rniɣ-d tasfift-iw taneggarut, i wumi giɣ azwel “Tujmiwin”.
Acimi d “tujmiwin” i textareḍ d azwel i tesfift-nni n 2016?
Imi uɣaleɣ-d aṭas ɣer temẓi-iw, mektaɣ-d ayen akk ddreɣ deg tallit-nni d wamek i tt-ddreɣ deg teswiɛt-nni. Yerna azwel-agi fkiɣ-t i tesfift s umata, acku ulac tizlit i wumi semmaɣ tujmiwin, ulac ula d afyir ideg i t-id-uddreɣ. Nekk tura friɣ-tt d rray-iw belli izwal n tesfifin-iw ilaq ad ilin jemlen-d akk isental n tuɣac-nni yellan deg-sen.
Neẓra belli tɛedleḍ aṭas akked ucennay Taleb Rabeh, amek armi?
Ulamma semḥaseɣ i tuɣac-is yerna ḥemmleɣ-t uqbel ad tissineɣ, maca deg yennayer n 2006, ssawlen-as-d akken ad yexdem tadwilt deg tiliẓri tazzayrit “Canal Algérie”, yuɣ ula d nekk nan-iyi-d ad dtecnuḍ yiwet n tezlit n 5 ddqayeq kan. Yuɣal yenna-as i uneɣmas-nni ilaq ad yili yid-i deg leblaṭu, ad imeslay am nekk, dɣa yefreḥ uneɣmas-nni s tigawt-agi igrrzen. Yerna imiren ur iyi-ssin ara, mi nekfa tadwilt-nni niɣ-as ayen txedmeḍ akken yenna-iyi-d lukan d nekk i yellan deg umkan-ik iyi-ɣaḍ lḥal mliḥ, dɣa deg wass-nni nuɣal d imeddukkal n tidet, netta iḥemmel-iyi seg yimir nekk tezad aṭas leḥmmala-w ɣur-s. Syin akkin niɣ-as ma maɛlic ad cnuɣ tizlit-ik, yenna-iyi-d ulac fell-as. Maca llan kra n yicennayen lliɣ ḥemmleɣ-ten mačči d izli, ḥemmleɣ ad asent-smuzegteɣ i tezlatin-nsen, maca mi iyi-tettunefk tegnit ssneɣ-ten uɣaleɣ kerhaɣ-ten aṭas.
Ma yella wayen tsewjadeḍ?
D tidet, sewjadeɣ yiwen n album amaynut, maca wellah ma ẓriɣ imelmi ara yewjed i wakken ad d-yeffeɣ. Ẓiɣ kan belli ad ilint deg-s 12 n tezlatin, yiwet s tefransist tiyaḍ akk s teqbaylit. D tasfift ideg daɣen ara ɣenin waṭas n yicennayen, gar-asen: yiwet n tcennayt tacenwit yettwassnen aṭas, yiwen n ucennay d uneɣmas i xeddmen akka tura a “El Watan”, d wiyaḍ. Ad d-tuɣal deg-s tezlit-nni Africa.
Ma yella wayen ara d-ternuḍ?
Bɣiɣ kan ad weṣṣiɣ icennayen-agi ilmeẓyen, i wakken ur ten-yetteffeɣ ara leɛqel i wakken ad kecmen ɣer ustudu, i wakken ad skelsen tasfift. Ilaq qbel ad cnun deg tmeɣriwin aṭas n tikkal, imi asayes iselmad aṭas n tɣawsiwin, i wakken ad d-tjemɛeḍ imferɣen-ik, i wakken ad txedmeḍ tadellet i yiman-ik d yawen ara d-tesuffɣeḍ ɣer sdat.
Awal-ik n taggara?
Tanemmirt-ik ɣef tdiwennit-agi iyi-texdmeḍ s tmaziɣti nekk d leqdicat-iw idelsanen. Iɛǧeb-iyi lḥal imi tadiwennit-agi tettwaxdam s tutlayt n tyemmat. Tanemmirt tameqqrant i Uɣmis n Yimaziɣen imi i yi-iga azal, ad awen-iniɣ afud igerrzen i kunwi d uɣmis-nwen. Ad iniɣ tanemmirt s tussda i wid akk iyi-ḥemmlen, d widak yesmeḥsisen i tuɣac-iw. Ma nebɣa tamaziɣt ad taẓ ɣer sdat, ilaq ad tili deg yal iḥricen n tudert-nneɣ, deg tɣamasa, deg tira, deg ccna, deg yidles s umata…atg.
Yesteqsa-t Adaoun Abdelghani