Lqem aneggaru n unasiw « Gboard » n Google ɣef usawal n ufus s ddaw Android d IOS yefka-d abeḥri i turin n yimaziɣen merra imi i d-isedda Tamɛemrit d Tifinaɣ.
Ɣas aṭas-aya i terǧa tmaziɣt, acu kan ass-a yeffeɣ-as leɛtab ɣer tafat. Agemmuḍ-agi yeḍfer iseggasen n usuter sɣur wid yesseqdacen tamaziɣt deg Internet akked yimeɣnasen-is. Ayen yessefraḥen daɣen, d afran n temɛemrit d tfinaɣ. Tamɛemrit, tira i d-yeǧǧa Dda Lmulud, d tin i sseqdacen tuget n yizzayriyen yerna d tin ara yeǧǧen win i tt-yesseqdacen ad kecmen taɣult tumḍint (domaine numérique) mebla uguren. Tifinaɣ, tira n lejdud d umezruy, d tin yextar Usinag Ageldan n Tussna Tamaziɣt (IRCAM) n Lmerruk. Neẓra merra belli ma nebɣa tamaziɣt ad tidir, ad tennerni, ilaq-as ad tekcem ɣer taɣult tumḍint. Imeɣnasen n tmaziɣt, fkan azal ameqran i temsalt-agi. Daymi asuɣel n yifecka illeliyen, asnulfu n yiḍrisen d yismal Web yeṭṭef-d abrid-is. Akken qqaren Wat-zik « Win yebɣan, yettnadi amek. Win yugin yeqqar kan ulamek ». Ihi, win yebɣan yezmer seg tura ad yesseqdec iminig ɣef Web Firefox n Mozilla, afecka n tirawt Skype d yifecka-nniḍen s tmaziɣt. Yezmer daɣen ad yerzu ɣer Wikipedia i wakken ad iɣer iḍrisen s tmaziɣt. Anasiw Gboard n Google yewjed i ussider baṭel deg Play Store (s ddaw Android) d App Store (s ddaw IOS).
T. Umaziɣ