Aṭas n yimezdaɣ n lwilaya n Tizi Uzzu i yeffeɣ leɛqel, ddurt iɛeddan, imi slan d akken aman n tissit n tbernint gellun-d s lehlak n Typhoïde, ladɣa imi d-ttbanen tikwal am wakken d iwraɣen. Asali-agi ur yesɛi ara lsas u d lekteb, ɣef wakken i d-nnan yimḍebbren, ama d wid n tenmehla n waman neɣ wid n sbiter. Ufan-t kan yimdanen yettwasuzer deg uẓeṭṭa anmetti (Internet), ussan-agi kan yezrin. Ayen yessekkren ahetwir deg twaculin, d assaɣ ay cudden wid i d-yefkan isallen-agi n lekteb, deg Internet, ɣer tmettan n snat-nni n teḥdayin tisetmatin i yemmuten ussan iɛeddan. Ihi, s kra n win yeslan s lexbar, yeḥbes srid ɣef tissit n waman n tbernint, yuɣal ɣer wid n lbiɛ u yerna yefka asalli i wid akk yessen. Akka i yemmeɣ lexbar, ‘’yezzi-d i udrar’’, yal wa irennu-as ciṭ n tecrurt i wakken ad t-icebbeḥ mebla ma inuda ɣef tidet anda tella. Seg tama n unemhal n ADE n Tizi Uzzu, Mass Berzoug « Aman yellan deg tbernint zeddigit, ur yelli d acu i ten-yuɣen, kkan-d seg ubaraj n Taxuxt. Ur nezmir ara ad nestehzi deg tezmert n yimdanen. Ihi, aman tessen medden, nettɛassa-ten ɣef tezdeg yal ass. Ass-a, nezmer ad d-nini, xas ad ten-swen yimezdaɣ n lwilaya mebla tugdi ». Si tama n unemhal n sbiter, Mass Abbes Ziri, yenna-d : « Ur yelli lehlak i d-yekkan seg waman n tissit. Ar tura, ur yelli umuḍin n lehlak n typhoïde i d-ikecmen ɣer sbiter neɣ ɣer yimekwan n usejji i yellan deg lwilaya n Tizi Uzzu. Ihi, wid i d-yeqqaren d akken glan-d waman s lehlak, mačči d tidet ». Ula d lwilaya n Tizi Uzzu, tessuffeɣ-d yiwen n ulɣu anda i d-tenna s ttbut d akken ur yelli d acu yuɣen aman n tissit n tbernint. Teṭṭalab, diɣ, deg yimezdaɣ n lwilaya akken ur ɣellin ara deg lecɣal am wigi ur nebni ɣef tidet u zemren ad swen aman n tbernint mebla tugdi ». Akken yebɣu yili lḥal, tebda tugdi i ikecmen imdanen la tneqqes u tennefsusi imi i d-mmeslayen yimḍebbren-agi ɣef liḥala n waman deg tbernint. Llan ugaden mliḥ, ladɣa, imi i d-ttbanen tikwal d iwraɣen, rnu qqnen tamsalt n tmettant n snat-nni n tsetmatin yemmuten ɣer lehlak n typhoïde i d-itekken seg waman.
Hocine Moula