Ahat ayen i yesqelliqen ugar anehhar mi ara yili i tẓayert ɣef tkerrust, d amxudneq i d-yettilin deg yiberdan. Ladɣa ma yella akud n tikli ɣer uxeddim neɣ sanda-nniḍen ur ilaq ad iɛeddi i tilas. Deg ubrid aɣelnaw wis tẓa, i yeqqnen abeɛda tawilayt n Bgayet d tin n Seṭṭif, ttidiren wat tkeryas akk iɣeblan n ddunit seg teswiɛin timenza n tnezzayt armi d tameddit. Segmi i d-yekcem unebdu izad uḥras ɣef snat n tikkal ahat. Tasebba n wid akk i d-yettẓuren Bgayet i uɛummu deg teftist neɣ i umerreḥ deg tɣemmar-is-nniḍen. Nnig tkeryas i yettabaɛen ɣer Bgayet, aṭas ihi n tid i yettwajerrden s wuṭṭunen n waɣiren-nniḍen, am Um Lebwaqi, Tabatent, Lezzayer, Jijel,… atg. «D ayen yesḥissifen wayen nesɛedday yal ass deg yiberdan-nneɣ. Abrid ara d-lḥuɣ deg 20 n tedqiqtin, leḥḥuɣ-t deg tsaɛet. D lmeḥna n tidet! ». Akka i aɣ-d-yenna yiwen n unehhar seg Bgayet. Ulama ur d-yeqqim waṭas akken ad kfunt ssmayem i yessawalen i umwan, yettusemma ula d tirza ɣer teftisin i d-ijebbden lɣaci, bdant neqqsent, mazal yeččaray ubrid-a aɣelnaw ama deg tisin neɣ deg tuɣalin. Ɣef waya llan wid yesmenyifen iberdan n twilayin, am win n Aweqqas-Kefrida, i wakken kan ad rewlen i ddḥis i asen-yettawin ayendin d akud. Deg uraǧu n keffu n lecɣal n ureqqeɛ d ussuseɛ n Ɛecba (les gorges) n Xerraṭa, i ara d-yeglun s wayen yessefraḥen i yimkerrusen.
M. K.