“Ma tkemmel aka liḥala deg yella Wasif n summam, ad yeglu s twaɣit i ugama d temnaḍt-agi”.
Aɣlaq n ugudu n Tḥaract, ideg ttaran iḍuman n yimezḍaɣ deg wagur n yulyu ar ass-a, ur d-yegli ara kan s lemḍara i tezmert n yimdanen d tezdeg n yizenqan n tudrin n tɣiwant n Uqbu akked Yilulen usammer, s umata tudrin Yicellaḍen d Yiɣram’’, imi lemḍara-s, tegla s twennaḍt ɣef tikelt: tiferkiwin, tiḥumal, iḥerqan n uzemmur,…atg. Gar yimukan i tḥuza s leqsaḥ twaɣit, d Asif n Summam i yuɣalen d rreḥba n yiresḍan. Imdanen d yimḍebbren n kra n tkubbaniyin, ɣer dinna akk i ttaran iḍumman-nsen . ‘’Win yessnen yakan asif-agi zik asmi i tecfen deg-s medden uqbel ad t-kecmen yiḍuman, ad tejraḥ tasa-s deg wayen i as-yeḍran’’ i d-yenna yiwen n umdan n 40 n yiseggasen. Ayen i ǧǧant tkubbaniyin n Cinwa i ixeddmen iberdan, kemelen-t lɣaci ass-a . Imdunen–nni i ɣzan Icinwanten, qqimen akk ur rbin ara s wakal. Asmi jemɛen rmel d udɣaɣ i ubrid ameqqran icudden Bgayet ɣer Waḥnif. Ass-a, uɣalen d tisrafin i yiresḍan ɣur-sent i ttdeggiren iresḍan. “Amdan ass-a yuɣal awi-d kan ad yessizdeg axxam-is, ma d tawennaḍt d ayen-nniḍen, mačči d aɣbel –is maḍi. Ma tkemmel aka liḥala deg yella Wasif n summam, ad yeglu s twaɣit i ugama d temnaḍt-agi”. I iwala yiwen umezdaɣ n temnaḍt-nni.
B. Benhamouche