Tahanouts d yiwet gar 23 n tuddar n tɣiwant n Ait Aissa Mimoun, i d-yezgan deg ugafa n tɣiwant-agi u deg ugafa n lwilaya n Tizi Uzzu, tebԑed ɣef temdin-a s wazal n 14 n kilumiṭr.
Taddart-agi, mazal ar ass-a n wussan tedder aṭas n yiɣblan d wuguren, imi tuget n yisenfaren n unegmu i d-iṣaḥḥen taddart-agi, wa mazal ur yekfi ara, wayeḍ mazal maḍi werεad yebdi, wayeḍ, wayeḍ… Gar yisenfaren yebdan yakan, u mazal ur kkfin ara, ad d-nedder tikkelt-agi : asenfar n unnar n Sidi Slimane, i d-yezgan deg usammer n taddart-a, tama n tmeqbert. Asenfar-a, bdan yimuhal-is deg taggara n useggas n 2013 di tazwara n 2014, ma d tadrimt i t-id-iṣṣuḥen liqider 560 n imelyunen n sentim, aql-aɣ qrib d taggara n useggas n 2017, yerna mazal ur yekfi ara. Ssebba tagejdant mi d-yella uneḥbus n lecɣal deg unnar-agi, imi yella yiwen upuṭu n trisiti deg yiwet n teɣmert seg teɣmar-is, imi iqerreɛ akemmel usewseε-is. Deg tazawara, iεeggalen n tesqamut n taddart, qeṣden Takebanit n trisiti d lgaz (Sonalgaz). Maca taneggarut-a, teḍleb-d aṭas n yidrimen, yerna tadrimt i t-id-iṣuḥḥen tekfa, ma d Asqamu aɣerfan aɣiwan n tɣiwant n Ait Aissa Mimoun ur d-igir ara afus-is, dɣa qqimen yilmeẓyen n taddart mebla annar. Syin akkin, uɣalen usan-d ixeddamen n Sonalgaz n Ouaguennun i wakken ad kemmlen, ad ksen apuṭu-nni, maca bɣan ad sɛeddin lexyuḍ deg tlemmast n unnar, dɣa uggin imezdaɣ n taddart-a. Dɣa seg wass-n ar ass-a, ur kemmlen ara asewseε n unnar-a n Sidi Slimane, ur xdimen tixxamin ubebdel n yimuraren, wala imukan yettuxeṣsen i yemferğen, yerna aya-agi akk yedda-d deg wahil n wannar-agi.
Adaoun Abdelghani