Ur zmiren ad ttun yimezdaɣ n tɣiwant n Ayt Smaɛel ass n 26 yebrir n useggas n 2009, asmi tettwabeɛɛej s lmus tuḥdiqt n Sunya Idir mi d-teffeɣ seg uɣerbaz alemmas Zemmuri Ɛmer ideg tella teɣɣar. Ṭam n yiseggasen tura ɛeddan, mazal ccama n uneḍruy arẓagan tersex deg wulawen. Dɣa, lǧemɛa-a iɛeddan, 22 deg cutember, yerra tajmilt d tameqqrant Ugraw Tigawin Ilemẓiyen (RAJ) n Ayt Smaɛel i teqcict-a i iruḥen d tasfelt i uttwaɣ n tmetti d yir taɣellist. D ahil d amerkanti i d-yettwaheggan seg 07:30 n tnezzayt armi d 17:00, deg-s d tajmilt deg-s d asḥulfu n tmetti ɣef yir tikliwin. Yebda wahil s tazzla deg yiwen n uzgen n umaraṭun n uqader d talwit i warrac ilemẓiyen ladɣa. Syin, ɣer 10:00, yella-d usenɛet n usaru-untim s uzwel n “Tiqeffet n tehyuft”, i d-yessufeɣ Mass Muḥemmed Mesɛudi.Ayen yeɛnan isaragen, llan-d tlata seg tzeggant n wass. Amenzu yemmug-d sɣur Massa Muḥemmadi Xadiǧa s yisem-is d tamsujjit n tnefsit, i d-yewwin ɣef ssebbat akked yisafaren n ubsal n warrac. Kra n wakud akken, iɛedda-d uselmad deg tesdawit Mass Meḥrez Buɛic, i usayes (scène) n uxxam n yilemẓiyen akken ad yessiweḍ kra n tektiwin ɣef « Amussu asdukklan d ucqirrew n umennuɣ mgal tekriḍt deg tmetti ». Ma yella d aneggaru-nni, iga-t-id uselmad Mass Rebbaɛi Racid ɣef tekriḍt deg yiɣerbazen. Mettwal 16:30, mi d-tettqarab taggara n warmud, temmug tekci n warrazen i wid i d-iberzen deg tikli-nni tazamulant. Armi ahaqel-itt d 17:00 n tmeddit, kkren yimheggiyen ad sbedden yiwet n teplakt n usmekti i yiseɣ n Sunya, tama n yimawlan n teqcict d waṭas n lɣaci i yebɣan ad ḥeḍren. Nezmer ad nɣer deg teplakt-nni tanaga ɣef wayen akken yeḍran, akked ubruy seg usefru i as-iga Mhenni Xalifi. « Nebɣa s ttiɛadat-a, nekni s Ugraw Tigawin Ilemẓiyen n Ayt Smaɛel, ad nḥesses ugar imezdaɣ-nneɣ akken ur yettɛawad akk ad d-yeḍru ɣur-neɣ wayen akken i d-yeḍran. Am wakken nekkat ad neg talast i wayen akk yettkellixen inubiyen d yilemẓiyen am tissit n yiɣisem d ukeyyef n tehyuft. Imi aql-aɣ nettwali acu i d-yettnulfun taggara-a ». D awal n Mass Samir Ɛerrar, aselway n tgezmi Raj-Ayt Smaɛel.
M. K.