Qqaren Wat zik. ‘‘I telhiḍ a ṭṭyab lemmer tesseččayeḍ aɣrum ». Akken ula d iberdan n waɣir n Bgayet seg usamar ɣer umalu.
Ulamma yefka-asen ugama ccbaḥa, ama rrif n yilel neɣ deg yidurar, maca yekkes-asen ugudu kra yellan din i iɛeǧǧben i tiṭ. Amedya n ubrid aɣelnaw wis 9 iɣef ttɛeddayen yigiman n yinehharen yal ass, yuɣal taggara-a, d acekti n medden i yesḥassfen ɣef yir liḥala ideg i t-id-ttafen, ideg i d-ggran yiberdan n Bgayet merra. Ula d iɣriben i d-ikecmen tamurt anebdu-a yezrin, beggnen-d aɣiḍi-nsen seg wayen i ten-id-iqublen deg wakal anda lulen, ama deg yiẓeḍwan inmettiyen neɣ ula deg rradyuwat. Ugar n yiguda d uhicur i yettenḍeggaren teɣzi n ubrid, ama sɣur yimezdaɣ n lemsaqat-nni neɣ sɣur wat tkeryas s timmad-nsen, ad iger umdan tamawt d akken ula d imukan n uḍegger n yiḍumman s ṭṭaqa, ḍḥan-d d ugur awennaḍan inmetti ameqqran. Amedya n temḍiqt n usras n yiḍumman n Uweqqas iwumi ssawalen yiɣermanen n temnaḍt-nni « Agudu n lɛib ». Ama truḥeḍ neɣ tuɣaleḍ-d, yal mi ara ad d-tekkeḍ deg umkan-nni i yumsen, ad ak-d-tewwet yiwet n tziffurt iwumi ur zmiren akk wanzaren. Acḥal i d-yellan d awal ɣef taluft-a, ama i yimḍebbren n tɣiwant n Uweqqas neɣ i wid n twilayt, maca ur d-wwin ara tifrat i tmukrist. Seg tama n umussu asdukklan, ulamma ɛerrḍent ddeqs n tdukkliwin ttheyyint-d tiwiziwin n usisdeg seg usihar ɣer wayeḍ, wanag mačči d ayen i d-igellun s ugemmuḍ i yettsuddun. Meskud akk iḥricen n tmetti uɣen tannumi ẓerren yal akal d amkan n uḍegger n yiḍumman, ur yettishil ara utthenni seg uɣbel-a.
M. K.