Sendiḍelli n ssebt, 14 deg waggur-agi n tuber ideg nella, ɣef 14h00 n tmeddit, tella-d temlilit deg Uzday adelsan Rahmani Slimane n Aokas deg lwilaya n Bgayet. D timlilit ideg i d-temmeslay tmarut d tneggalt akked tmedyazt Massa Lynda Koudache i d-yewwin awal s telqay ɣef wungal-is aneggaru i wumi tga isem-agi “Tamacahut taneggarut” i d-yeffɣen deg useggas yezrin ɣer tezrigin Routnahcom, yerna yis-s i tewwi arraz amezwaru n Assia Djebar n tsekla tamaziɣt deg useggas n 2016. Temmeslay-d, diɣen, s umata ɣef wungal-is wis sin, ama deg wayen yeɛnan awdem agejdan n wungal-agi akked yiwudam-nniḍen yellan deg-s. tewwi-d daɣen awal ɣef tira n wungal s teqbaylit d tirmit-is nettat imi s timmad-is d taneggalt. Yella-d daɣen uskasi sɣur wid i iffuden tamussni d d yidles, imi nettat teɛreḍ amek ara d-terr akk i yisteqsiyen i d as-yettunefken ɣef teɣzi n ssaɛa. Ad d-nesmekti kan belli Lynda Koudache, d taneggalt n sin wungalen s tmaziɣt, amezwaru tsemma-as “Aɛecciw n tmes”, wis sin d aneggaru-agi “Tamacahut taneggarut”. D nettat i d tameṭṭut tamezwarut i yuran ungal s tmaziɣt deg tmurt n Lezzayer.
G.A.