Yella yiwen yesεa sebεa warrac. Teddem tmeṭṭut-is tadist, yeḥdeṛ-d ad d-tarew. Heddṛen medden di tejmaεt, nnan-as: « Leflani ad yernu γur-s uqcic, yerna atmaten-is di sebεa usmen, ur t-bγin ara ». Mi tesla Stut i medden heddṛen akka lehduṛ-agi, teddem tessaweḍ-iten-id i warraw n urgaz-nni. Msefhamen di sebεa yid-sen, ggullen, nnan-as: «Nεuhed-ik a Ṛebbi ar ma tesεa-d yemma-tneγ taqcict, ad neddem isuḍaf, ad nγenni, ma tesεa-d aqcic, ad neddem isuḍaf ad nennejli. ». Lmeεna-s, ma tesεa-d yemma-tsen taqcict, ad kkren s urar d ccnawi, ma tesεa-d aqcic, ad refden ifassen-nsen d yiḍarren-nsen, ad kken tawwurt, ad nnejlin. Tesla-asen Stut mi ttgallan akka, tṛuḥ tqusem-asen tameddit n wass i deg d-turew yemma-tsen, teqqar-asen yiwen, yiwen: « Ay a leflani, yemma-k terna-d aqcic! » Ihi, ur nudan ara ula d anadi ad ttḥeqqen ma d tidet, ddmen isuḍaf, nnejlan. Yemma-tsen d taqcict i d-tesεa mačči d aqcic. Nutni nnejlan, ğğan imawlan-nsen. Tru yemma-tsen armi teεya, tuγal teṣber s tmara. Armi d asmi tewweḍ teqcict d tamazzalt. Ass-n deg wussan n Ṛebbi, tṛuḥ teqcict γer tala. Tqusem-as daγen Stut, tawi yid-s tayedḍiḍt n uγerda, ternu taγerbalt, tessendi-ten s amizab ad ččaṛen. Taqcict, tuṛğa, tuṛğa, tuṛğa armi twala tugi ad as-teg Stut nnuba ad teččaṛ, tuγal tenna-yas: « Ttxil-m a yemma tamγart, eğğ-iyi ad ččaṛeγ. Tenna-yas Stut s ttiha d ulaqeb : « Ṛuḥ a timnejlit n sebεa watma-s! » Tuγal-d teqcict sakin s axxam tettru. Tettḥellil-itt yemma-as ad as-d-tini d acu tt-yuγen: ulac. Taqcict tegguma. Armi d yiwen ubrid, tuγal tenna-yas: « A yemma, bγiγ askaf. Tenna-as yemma-s : « -Yirbeḥ! » Tγil fell-as i tettru, tekker tmeṭṭut s askaf. Armi tebda amsal, tekkes-d snat ar tlata n tcufftin, teddem turez-as yelli-s afus-is γer daxel n teṛbut-nni. Tameṭṭut tettsuγu, tettḥellil yelli-s ad tt-tessukes si teṛbut yerγan. Taqcict-nni teqqar-as: « Alamma tεuhdeḍ-iyi ar kra ad am-ssutreγ ad iyi-t-txedmeḍ. Tenna-yas yemma-s: « Ssukkes-iyi-n kan seg wurγu, εahdeγ-kem, εahdeγ Ṛebbi ar d am-xedmeγ kra n wayen tebγiḍ. Tebra-as sakin i ufus-is, yeccelfex, yettnezluluf. Armi ččan imensi, tuγal-d γur-s tenna-as: « Mel-iyi tura acuγer i yi-txedmeḍ akka? ». Tenna-as yelli-s: « Ad iyi-taγeḍ aεeqqa yessawalen! Ad i yi-ternuḍ alγem d taklitt! » Tettkemmil…
Seg tgemmi taqbaylit