Yella yetturaǧu, ussan-a ineggura, ad d-yerzu uneɣlaf n yiqeddicen izuyaz ɣer Ɛecba (Les gorges) n Xerraṭa i uḍilli ɣef wamek teddun dinna lecɣal. D ayen i d-yellan dɣa ass n 9 deg ṭuber-a mi d-yeddukkel Mass aneɣlaf Ɛebdelɣani Zeɛlan akked kra seg yirgazen n uɣlif-is i usefqed ɣef usenfar-a n ussewseɛ d ureqqeɛ n ubrid-a aqbur n Ɛecba i yebdan sendilindi. Seld amuqel i tegnit i n-yufa, ibeggen-d uneɣlaf kra n wurrif ɣef tikli n lecɣal iɣef yenna tɛeṭṭel aṭas. Armi dɣa yefka asuneḍ i wid i teɛna taluft akken ad walin deg ferru n yisergal imi awanek iga-d akk ttawilat n tedrimt ilaqen i keffu n yiqeddicen-a n Ɛecba. Deg teɣzi n tirza-a i d-ijemɛen ayendin d lɣaci, ifures dɣa tagnit uselway n tɣiwant n Xerraṭa akken ad as-yeccekti i Mass Zeɛlan ɣef yiɣeblan akk i d-ttmagaren seg lxedma n ubrid-a. War ma nettu anezgum n ufalu n Xerraṭa i yezgan d amihi ageɛmir ɣef yinehharen. Yelha ad d-nesmekti d akken aṭas n yiberdan i iḥebbes/yettkemmil usenfar-a, ayyuren iɛeddan. Tikebbaniyin i t-yeṭṭfen, llant ssuturent tazwara ugar n yidrimen, syinna ssutrent adrim swayes ara xellsent ixeddamen. Maca taswiɛt-a, nezmer ad d-nini d akken teddun lecɣal akken iwulem bac xersum ad yamed usenfar n ubrid n Ɛecba deg useggas n 2019, akken i yella deg umtawa. D ayen ara d-yawin aserreḥ n tikli deg ubrid aɣelnaw wis 9, am wakken ara d-yeglu s waṭas n talwit deg yiqerra n yiseqdacen n ufalu n Xerraṭa i yettwabnan deg yiseggasen n tmanyin. Tallit-nni, yemmug i lqidar n 8000 n yikerrusen i wass, ass-a ahat tekken seg-s ugar n 35000. Ihi, ma yella ikerrusen yeẓẓayen ad uɣalen ad ttawin kan abrid n Ɛecba deg tisin seg Seṭṭif i Bgayet, mi ara yekfu, ad yessenqes waya ahat seg yisehwa (laksidat) n yiberdan. «Tazwara d ugur n tedrimt i yellan deffir n uɛeṭṭel n usenfar-a, ɣef tsebba n tezɣint i iḥuzan tamurt. Dɣa ruḥen yimḍebbren n tkebbanit-a armi sḥebsen kra n yixeddamen imi ulac s wacu ara ten-xellsen. Maca tura, iban-d wudem n usenfar ». Akka i d-tenna teɣbalut-nneɣ i iqerben nezzeh i usenfar-a.
M. K.