Ɣas ma yal tasemhuyt, tettili-d lɣella seg ṭṭjur yemgaraden, ama d tid i d-yettarwen igumma, neɣ d tid n wayen-nniḍen i d-yettakken ayen yettwaččayen am ugusim d lluz, maca seg useggas ɣer wayeḍ, simmal tettenqas lɣella-nni. Dɣa ma nmuqel i yiḍelli iɛeddan d wakud n wass-a, ad d-ixemmem kan yiwen d akken deg yiseggasen i d-iteddun, ad d-tuɣal lɣella qrib ad tfak deg tferkiwin. Aṭas n tmentilin i yellan deffir uɣilif-a yesḥissifen. Gar-asen ad d-nebder temɣer n kra n ṭṭjur i yessenqasen tarawt seg tsemhuyt ɣer tayeḍ, akked wuguren n waddad n ugama d wakal ideg ttidirent ṭṭjur-nni. Maca aɣilif ameqqran yekka-d seg umdan i yeǧǧan seg wacḥal-aya llhu d ṭṭjur d wuẓi-nsent, ur neḍfir aqeddic n yimezwura-nsen i mazal yettak-d ar ass-a lfayda imi iban d akken ur yettdum kra i lebda. Iban daɣen belli ayen yettruḥun yettili-d wayen ara t-ixelfen. Acu kan, aṭas n yimezdaɣ n usamar n Bgayet i yestehzan seg zik deg ccɣel n wuẓẓi, d ubaɣur i yettwawfayen seg-s. Win yerran lwelha i lɣella-a i yettenqasen, i qrib ad tenger, ad yeɛqel timḍerrit i d-ilulen ɣur wid i yennumen meggren-d aṭas, teṭṭfen i nutni, rennun snuzuyen i wid-nniḍen ur nesɛi ṭṭjur i d-yettarwen lɣella-nni. Armi ula d imdanen i yettaɣen, yewɛer-asen lḥal ad afen win ara asen-yessenzen seg wakken ur yesɛi nnig n wayen iwumi yesra. Neɣ ma ufan s uḥebber, ilaq ad xellsen s leɣla bac ad aɣen ayen beɣɣun, am ugusim iwumi tettzid ssuma imi yuqa. Dɣa, ɣas ma taggara-a, bdan drus n yimdanen ttakin-d seg tɣeffal i ten-yessegnen, tessettu-asen ayen iɣef ilaq ad cfun, d wayen i yessefk ad t-ḥerzen. Ulamma uɣalen teẓẓun ṭṭjur, meɛna ad yeqqim lexsas skud mazal tḍul lɣella n ṭṭjur-nni i yettwaẓẓan s uɛeṭṭel.
Kaissa Khalifi