lamma zrin 35 n yiseggasen ɣef tmenɣiwt n umeɣnas n tugdut akked yizerfan n umdan Kamel Amzal, maca mazal imdanen cfan ɣef wass n 2 deg waggur n unbir 1982. Ulac win ur iɣaḍ ara asmi yettwanɣa s yifassen n yimṭurfa akked yiɛdawen n tudert akken i asen-yeqqar Lwennas Maɛtub deg yiwen n usefru. Yettwanɣa daxel n tesdawit n Ben Ɛeknun, deg Lezzayer tamaneɣt, ass 2/11/2017. Kamel Amzal, yemmut lmut n yirgazen yesɛan tabɣest d tissas. Yettwanɣa imi yettuneḥsab d ameɣnas n tutlayt d yidles amaziɣ u d ameɣras n tugdut d yizerfan n umdan. Ilul umeɣnas-agi, deg yirebbi n timunent n tmurt n Lezzayer, i d-yellan deg useggas n 1962, deg taddart n Tiferdud deg tɣiwant n Abi Youcef deg lwilaya n Tizi Uzzu. Yella d asdawan yettkemmil tizrawin-ines tufrinin deg tesdawit n Ben Ɛeknun, yellan deg Lezzayer tamaneɣt. Ruḥen yidammen-is d asfel amezwaru n yimeɣras n tugdut d yizerfan n umdan deg tmurt n Lezzayer. Yella daɣen, yettḥarab ɣef tektiwin-is yerzan idles amaziɣ, tilelli n rray n umeslay, tugdut akked yizerfan n yimdanen, dɣa yemmut fell-asen. Ssebba n tmenɣiwt-is, sɣur yimṭurfa inselmen i iqeddcen i lfayada n ukabar-nsen daxxel n tesdawit, d ulɣu-nni i iɛelleq deg lḥid daxel n tesdawit, ɣef lewhi n 8 n tmeddit. D ulɣu i d-yessawalen ɣer temlilit n yisdawanen n tesdawit, i wakken ad xedmen tasqamut ara d-yessuddsen leqdicat. Akken kan teǧuǧǧug deg-s temẓi, dɣa sewzlen-as leɛmer, rran-as tilist i tudert-is netta akken kan yeṣṣaweḍ 20 n yiseggasen deg leɛmer-is. Suzlen-as idammen-is yeḥman, yerwa-ten wakal, uggarent-d kra n tmiqwa i wakken ad d-qqiment d ccfawat. S ujenwi aqeṭɛan i wwin tarwiḥt-is deg tmeddit n wass-nni 2 deg unbir 1982. Ɣer taggara, ad d-nesmekti kan belli, taddart n Tiferdud ideg ilul, d nettat i yewwin arraz amezwaru n tezrigt tis semmus n temsizzelt n taddart tazedgant “Aissat Rabah” n lwilaya n Tizi Uzzu, dɣa tewwi 800 melyun n sentim. Imezdaɣ n taddart-agi, ttɛuzun-t aṭas, yerna tura zemren ad zuxxen yis-s, imi tamezwarut tefka-d argaz bu tissas d tebɣest yemmuten d ilemẓi, wagi d Kamel Amzal. Tis snat imi tewwi arraz amezwaru n taddart tazedgant deg lwilaya n Tizi Uzzu.
Ghani Amazigh