Sendiḍelli n ssebt, 28 deg waggur n tuber, i d amenzu n Leḥlal deg leḥsab n tfellaḥt ɣer yimaziɣen. Ɣef wakken i d-qqaren wat zik ur beddun ara medden lqeḍ n uzemmur alamma d amenzu n Leḥlal, yerna ad rǧun ass n ttlala neɣ lexmis deg ddurt tamenzut n waggur n unbir i wakken ad jemɛen iɛeqqayen imenza. Imi ɣef lehsab-nsen, mi ara bdun deg sin wussan-agi, tettili lɣella s waṭas, yerna ula d tissirt n uzemmur, ur tettciddi ara deg wussan-nniḍen n ddurt, ilaq d ttlata neɣ d lexmis. Dɣa deg temnaḍt n Ouaguenoun, mazal ar tura ṭṭfen deg leɛwayed-agi i icudden ɣer uzemmur. Gar-nneɣ d kra n wussan, ad d-yelḥaq lawan n ujmaε n lɣella n uzemmur, imi ha-t-an akken kan yebda isebbeɣ. Ulamma aseggas-agi izad uɣurar akked lḥammu deg unebdu-nni yezrin, maca ur d-yegli ara s txeṣarin ɣef tzemmrin. Am wakken daɣen i yeslek i yijajiḥen n tmes i yeččan azal n 90 000 n ṭṭjur n uzemmur deg wakal akk n lwilaya n Tizi Uzzu. Yerna seg zik, tamnaḍt-agi tettwassen s lɣella n zzit n uzemmur, maca deg yiseggasen-agi iεeddan ur tessefraḥ ara tarewt n uzemmur imezdaɣ n tama-a, ma d aseggas-agi yeččur-asen allen-nsen, yerra-asen asirem, imi tudert n ddeqs n twaculin ɣur-s i tcudd. Dɣa deg useggas-agi, la nettwali lɣella n uzemmur tella s waṭas, d ayen i yessferḥen aṭas ifellaḥen n temnaḍt-a n Ouaguenoun, imi xuṣent tarewt ṭṭjur n lfakaya-nniḍen yecban : lexrif, aḍil…atg. D ayen ara yeğğen tuget deg-sen ur d-ttağğwent ara zzit n uzemmur s tmara, imi ula d wid yesɛan kan kra n tzemmrin, ad d-awin ahat ayen ara tent-ikafin ɣef teɣzi n useggas, neɣ ma uǧǧwent, ad d-aǧǧwent cwiṭ kan. Aṭas n lğihat n temnaḍt-agi ideg i d-iban belli lɣella-a n uzemmur tella s waṭas. Imi llant tzemmrin ur d-ngir ara ula d aεeqqa deg useggas iɛeddan, maca aseggas-agi urwent armi bɣant ad rẓent. Lɣella n tikkelt-agi, tesxreb-asen leḥsab i yimussnawen deg taɣult-agi n tfellaḥt, i yellan qqaren-d belli tizemmrin yellan tama n ubrid ttarwent s waṭas, imi aɣebbar-nni yettilin fell-asent yettqerriε aṭas n lehlakat. Tid ixeddmen daɣen seɛɛunt s waṭas, maca llant ṭṭjur n uzemmur aṭas-aya ur xdiment ara yerna urwent, ladɣa ɣef lecḍuḍ. Acu kan ala yiwen n umgired i yellan gar-asent, imi tid ixeddmen s waṭas, i ifersen akken ilaq, ad sɛunt ugar, yerna ad yelhu uɛeqqa-s. Ulamma deg useggas yezrin ixuṣ uzemmur, maca aseggas-agi yella lxir. Ilindi imi ulac aṭas dɣa tenza zzit n uzemmur dagi deg Ouaguenoun s 800 DA i litra. Ma d aseggas-agi yezmer lḥal ad tenz s 750 DA neɣ ahat s 700 DA, imi i d-yefka Rebbi deg lxir-is ur icuḥ ara. Am wakken daɣen lɣella-agi yellan s waṭas, afellaḥ tessferḥ-it seg tama imi tella lɣella, maca ur teffiɣ ara aṭas fell-as imi yeẓra belli ad d-ṣubb deg ssuma. Ma d inaǧǧawen ferḥen aṭas, imi s tama, yella wayen ara d-awin seg wayla-nsen, yerna ur d-ttaǧǧan ara aṭas am yiseggasen i iɛeddan, rnu ɣur-s s ssuma rxisen cwiṭ ɣef useggas yezrin.
Adaoun Ghani.