Mazal yettkemmil umaru, amedyaz, Mass Abdelnasser Rabia asufeɣ n yidlisen n yisefra. Seld sin yimezwura i d-yessaẓreg ilindi kan, neɣ deg useggas n 2016, yiwen s teqbaylit iWumi isemma: « Abrid n usirem », wayeḍ s tefransist, yefka-as azwel: « Les blessures du temps », yuɣal-d aseggas-a mmi-s n Tubiret, n temnaḍt n Cerfa, s udlis-is wis kraḍ i yesɛan isem: « Les espoirs perdus ». Taktabt-a tamaynut, teffe¥-d ass n 17 deg wayyur-a n ṭuber, ɣur teẓrigin Merabten n Tezmalt. Ma nemmeslay-d ulamma cwiṭ ɣef udlis-a i d-ilulen, ad d-nini d akken yettawi ddeqs n yisebtar, iɣef rsen 31 n yisefra, ttwarun ɣef qeddac n yisental yemgaraden, yessetna-ten umeskar am tezrart s wawalen d yisekkilen. Gar yisental-nni, ad naf wid n lɣerba, tayri, timetti, akked tejmilin. Maca tuget seg-sen, d wid iɣef yettwaḥuza umedyaz Abdelnasser Rabia, neɣ d wid i yesnernan asḥissef d ameqqran, ama deg wul-is, ama deg wulawen n yimdanen s umata. «Ssefriɣ aṭas ɣef leḥzen d yiɣeblan n tudert deg tektabt-iw tamaynut. Yal amdan, iban ur yelḥiq ayen yebɣa merra di ddunit. Ɣas yella wayen yessarem yiwen yewweḍ-it, lameɛna yella usirem ur yezmir ad t-yelḥeq. Dɣa yettili-d wass ideg yettruḥu usirem-nni seg wulawen n wid yessaramen», i d-yenna Mass Abdelnasser Rabia. D aya i t-yeǧǧan ad yefren i tektabt-is azwel-a: « Les espoirs perdus ». Yuɣ lḥal, adlis « Les espoirs perdus » yella tura deg tnedlisin, yettnuzu s wazal n 100 n yidanaren.
Kaisa Khalifi