I lmend n usmekti wis 63 n tegrawla n tmurt n Lezzayer , aṭas n leqdicat i d-yettuheyyan deg lwilaya n Tizi Uzzu. Leqdicat-a, llan-d ddaw n leɛnaya n Uxxam n yidles Mulud Mɛemmri, Tanmehla n yimeɣrasen, Tasdawit n Mulud Mɛemmri, tidukkliwin i iqedcen deg unnar akked twaculin n yimeɣrasen. Yebda wahil seg wass n letnayen 30 di tuber deg Uxxam n yidles s temsikniyin n yidlisen n umezruy d yimagraden i d-yettmeslayen ɣef Kateb yacine, Mhamed Isyakhem, Ali Zamoum. Ma yella deg Uxxam n umezgun Kateb yacine, tella-d yiwet n tecquft n umezgun “La poudre d’intelligence “ sɣur tdukla n yilmeẓyen n Yiɛekkuren. Am awkken i d-iɛedda, diɣ, deg Uxxam n sinima usaru “L’étoile d’Alger” n Rachid Belhadj, syin yella-d uskasi ɣef usaru-a. Ma nuɣal-d ɣer Uxxam n yidles (centre culturel) Matoub Lounes n Ain El Hammam, ad naf d urar n yiwet n temzgunt s yisem-is “ Yenna-iyi jeddi”. Ass n tlata 31 di Tuber, tella-d yiwet n tuffɣa ɣer taddart Iɣil Imula di tɣiwant n Tizi n Tlata , syin yella-d umeslay, deg tzeqqa tamecṭuḥt n umezgun n Uxxam n yidles, ɣef wudmawen-nni i wumi tuɣal tejmilt wigi Issiakhem, Kateb akked Zamoum, Sɣur Mass Zamoum Rabah, Massa Boukhelou fatma, Massa Kabla djamila, Mass Yacine Si Ahmed akked Massa Zamoum Ouiza (taǧǧalt n umeɣras Ali Zamoum) . Ma yella d axxam n yidles Krim Belkacem n Azazga, llant-d temsikniyinn yidlisen d yimagraden n yiɣmisen i d-yettmeslayen ɣef umezruy. Akken daɣen i d as-tuɣel tejmilt ama i twaculin n yimeɣrasen, ama i unaẓur Akli Yehyaten sɣur Axxam n yidles . Ma yella ass n umenzu n unbir : llan-d, deg uxxam n yidles, isaragen s yisental i icudden ɣer umezruy n tmurt, akken daɣen i d-uraren yilmeẓyen tamezgunt ‘Le foehn’ s tmaziɣt ‘’Ha-t-a lquḍ hata uqamum’’ n Mouloud Mammeri deg usmekti n meyya n yiseggasen ɣef tlalit-is. Ma yella d Tiddukkla tazazrayt n taddart n Tamda s tama-is, ur tezgil ara tagnit n usmekti-a imi tettwanec-d ɣer CLS n lwilaya anda i d-xedmen ahil-nsen ama d amezgun ama d cnawi, akken ad rren tajmilt i yirgazen i yefkan idammen-nsen ɣef tlelli n tmurt.
S. Y.