Ass-nni n umenzu n unbir 2017 i d-tella tẓunzut (inauguaration) n usebdad n yimeɣras sɣur lwali n Tizi Uzzu, deg taddart Tala Ɛetman, i ibeɛden s 15 n kilumitr ɣef temdint n Tizi Uzzu.
I lmend n waya, aṭas n leqdicat i d-heggan yimezdaɣ n taddart akked tdukliwin, ama tinaddalin, ama dtidelsanin. Akka, dɣa, i d-ccnant teḥdanin timecṭaḥ, i n tdukkla Imɣi n Tala, i d-yelsan tiqendyar n leqbayel, kra n tezlatin n tegrawla, yecban ‘’A yemma sber ur ttru’’, ‘’Ma tecfam ay igudar’’…atg. Syin d inaddalen n tdukkla Inaddalen n Tala Athmane i d-yesneɛten kra deg uxeddim-nsen anaddal. Ma ɣef lewhi n lweḥda, tella-d lwaɛda i d-yettwaheggan i lmend n waya. Ttwanecden akken llan yimdanen ɣer seksu s yiyuzaḍ. Aṭas, diɣ, n trebbayaɛ n yikabaren n tsertit i d-yerzan ɣer usebdad-agi anda ssersen tameqqunt n yijeǧǧigen. Am wakken i d-yusa, ula d netta, yimḍebber amezwaru n daira n Tizi Uzzu i wakken ad yesterḥem ɣef 22 n yimeɣras-gi n tegrawla anda llan 8 deg-sen d ilmeẓyen, mmuten urɛad zwiǧen. Amur ameqqran n warraw n yimjuhad-agi, ur ssinen ara baba-tsen, neɣ ur as-cfin ara imi llan d igerdan imecṭaḥ asmi mmuten yimawlan-nsen. Ɣef leqdic-a, yenna-d Aliouat Ferhat, yiwen gar yimezdaɣ n taddart Tala Ɛetman « Ayen i asen-nexdem drus i yimeɣras-agi. Uklal tajmilt tameqqarnt. Rnu ɣer wanect-a, asmekti-nsen d izen i tsuta-agi i wakken ad issinen amezruy-nsen u ad ddun deg ubrid n yimezwura. Tanemmirt, diɣ, i kra n wid iqedcen deg tejmilt-a igerrzen nezzh ». Yella-d useggem n usebdad-a, ussan-nni kan, sɣur taɣiwant n Tizi Uzu. Ɛawden i yiẓekwan n yimeɣras akken iwata mebɛed mi llan deg yir liḥala. Am wakke i d-xelqen, diɣ, yiwen wurti azegzaw ɣer tama n usebdad anda gan imekwan n yiɣimi i yimdanen. Seg tama-a Abderrahmane Moula, s yisem-is d imḍebber deg tɣiwant n Tizi Uzzu ɣef taddart n Tala Ɛetman, yenna-d ; « Nebɣa ad as-nefk, aseggas-a, i usmekti n tegrawla n 1954 udem-nniden dagi ɣur-neɣ deg taddart. Nefreḥ aṭas imi nessaweḍ s ayen nessaram, tɛedda tejmilt akken iwata. Ad snemreɣ akk wid i d-yefkan afus n tallelt, ama d imezdaɣ n taddart ama d iberraniyen».
Hocine Moula