Kkrent-as Tdukkla Tinmettitadelsant Asirem n Krun d Tdukkla Tadelsant Adrar n Fad, deg tɣiwant n Ayt Smaɛel, i yiwet n tekti s wazal-is urɛad i d-tella deg tuddar-nneɣ. Dɣa, ussan-a kan, sufɣent-d tiɣri i tlawin n temnaḍt ma bɣant ad ɣrent tamaziɣt, ad jerrdent iman-nsent i temsirin ara d-yettmaggan sɣur walbaɛḍ n tselmadin i d-yeffɣen s ugerdas n tmaziɣt ur ufint ara axeddim. D asurif i yuklalen asebɣes meskud tiddukkliwin-a fernent ad ddment imanen-nsent s yimanen-nsent di lawan ideg Aseqqamu unnig n timmuzɣa iɛeṭṭel deg ussuseɛ n wahil-is n usegmek (alphabétisation). « Nebɣa s tigawt-a ad nqis sin n yiswiyen ɣef tikkelt; deg-s ad nessegmek tulawin-nneɣ deg tutlayt-nsent, deg-s ad nefk tagnit i kra n teqcicin ad xedment ». I d-yenna yiwen seg wid yekkin deg ccɣel-a. Ad d-nesmekti d akken ssuma n ujerred i tɣuri-a, yewweḍ ɣer 800 DA i wayyur. D ayen swayes ara tettwaxellas tselmadt ara yeṭṭfen tilawin-a. Ma d azemz aneggaru n ujerred yettwaɛeyyen-d ɣer 15 deg wayyur n wunbir-a ideg nella. Ulamma telha tigawt-a seg uwellih amezwaru, iɛeggalen n tdukkliwin-a yezdeɣ-iten ukukru ma ad tesmurres neɣ uhu. Ma ad taweḍ dɣa tiɣri akken ilaq i tlawin d yirgazen-nsent neɣ yal yiwen amek ara yestehzi. « Nekk ḥaca taɣuri ara ɣreɣ lemmer ad nili deg waṭas yid-nteɣ. Amek mi tuɣ d asegmek s teɛrabt ɣriɣ, tura mi d tamaziɣt ad ggamiɣ? D awezɣi ». D awal n yiwet n tmeṭṭut seg Ayt Smaɛel. M. K.
