I lmend n umecwar aɣezzfan n ccna i d-yewwi unaẓur ameqqran Akli Yeḥyaten, tuɣal-as tejmilt meqqren ass-nni n ttlata 31 deg waggur n unbir 2017, deg Uxxam n umezgun amniḍan Kateb Yasin n lwilaya n Tizi Uzzu. D ttiɛad i d-yettwassuddsen sɣur Tenmehla n yidles n lwilaya n Tizi Uzzu akked Umazday n yirmad idelsanen d yinaẓuren. D yiwet n tejmilt s wazal-is i unaẓur ameqqran n tezlit taqbaylit. Wagi d Akli Yeḥyaten, yesɛan akka tura 84 n yiseggasen deg leɛmer-is. Yettuneḥsab d yiwen gar lecyax deg uẓawan n tmurt taqbaylit. Yella-d leqdic-agi adelsan deg Uxxam n umezgun Kateb Yasin n Tizi Uzzu. Imsuddsen n leqdic-agi, heggan-d yiwen wahil d anesbaɣur; imi ass-nni n larebɛa 31 tuber 2017 ɣef 10h00 n ssbaḥ, tella-d tulya tunṣibt n tejmilt-agi sɣur tnemhalt n yidles n Tizi Uzzu. Dɣa deg tzeqqa n temsikniyin, tella-d yiwet n temsikent n tesfifin-is tiqdimin d yimagraden n tɣamsa yettwarun ɣef tudert-is d leqdic n urgaz-agi ameqqran, akked yiwet n temsikent n wayen yerzan tagrawla tazzayrit d umussu aɣelnaw. Am wakken daɣen i d-sneεten yiwen usaru i d-yewwin ɣef tudert n ufennan-a aqbayli aqbur. Ma ɣef 20h 30 d afella, tella-d temlilit d unaẓur d uskasi d tririt ɣef yisteqsiyen n wid akk i t-iḥemmlen neɣ i as-isellen. Tekfa tejmilt-a s tmeɣra n ccna meqqren, ideg cnan waṭas n yifennanen, am wakken diɣ i d-fkan yimeddukal-is akked twacult-is kra tnagiyin ɣef tmeddurt d umecwar-is. Am wakken tella d tannumi deg tejmilin n yifennayen, ula deg tejmilt-agi aṭas n yicennayen imeqqranen d yimeddukkal-is akked waṭas n yiwudam n yidles n lwilaya n Tizi Uzzu, i iḥedren timlilit-agi.
Ghani. A