Ulamma, am yal aseggas, yella-d kra n ukukru ɣer medden i ucraḍ mgal azleg neɣ abeḥri, aṭas i t-igan ɣer taggara, ama d imecṭaḥ neɣ d imeqqranen. Ladɣa mi d-iban d akken acraḍ-a yelha maḍi i yimɣaren d wid yesɛan aṭṭanen idumen. Deg tɣiwant n Ayt Smaɛel, tettunefk tezwert i warrac n uɣerbaz. Ussan-nni imezwura dɣa, mi d-yekcem ucraḍ ɣer tmurt, akk inelmaden n yiɣerbazen n Ayt Smaɛel ɛeddan seg tigawt-a n uḥuddu d uḥami mgal azleg asemhuyan (saisonnier) n tegrest. Ma yella lawan-a, seg tikkelt ɣer tayeḍ, llan yimɣaren i yettceyyiɛen ɣer tensafart ad d-aɣen acraḍ-a, neɣ rezzun ɣer tzeqqa n udawi n Tizwal, ad d-wwten tissegnit-a. Ad d-nesmekti belli si tama n yimɣaren, yefka-asen uɣlif n tezmert snat n tferniwin i uxdam n ucraḍ i yella baṭṭel; aha ad qerrben ɣer tzeɣwa n udawi, neɣ ɣer tensafarin ansi ara d-aɣen acraḍ-nni ara yili yettwaɣram-d. Ayen yeɛnan lqidar n yicraḍen i d-yemmesɣen, ɣef wawal n ugensas (représentant) n uɣlif n tezmert deg umaṭṭaf aɣelnaw, ad ilin ɛeddan amelyun d uzgen n yicraḍen. D ayen ara iqidden akken i d-yenna, imi nnumen annect-n i d-ttaɣen yal aseggas. Meskud d tagrest, mazal tettkemmid tedwilt-a n ucraḍ alamma d furar i d-iteddun, neɣ alamma kfran yicraḍen i inuḥen.
M. K.