Xas ulamma turar tarbaɛt n yilmeẓyen n leqbayel (JSK) s wudem yelhan, ma yella neqren-t ɣer wayen iɛeddan, acu kan ur tessaweḍ ara ad terbeḥ tarbaɛt n CSC i yellan akka tura ɣef uqerru n telɣuɣa.
Deg tazwara n temlilit, kecmen-d yimyurar n JSK s lebɣi d ameqqran i wakken ad rebḥen timilit-a, imi ugar n 8 n tenqiḍin i sruḥen deg unnar n Tizi Uzzu. Akka dɣa i yessaweḍ umyurar Mesbaḥi ad yaweḍ s iswi deg ddqiqa tis 27 n temlilit. Tkemmel tarbaɛt n yilmeẓyen n leqbayel s wudem yelhan armi d taggara n uḥric amezwaru n temlilit. Ma d tarbaɛt n CSC, ur texdim kra ara yessergigin acebbak n JSC. Amur ameqqran n lweqt, sɛeddan-t yimyurar inebgawen deg tama-nsen. Wissen ma s tḥerci i qqimen ɣer deffir, neɣ ttraǧun tagnit iwatan i wakken ad ẓedmen, ma neẓra d akken tarbaɛt n CSC, trebbaḥ timliliyin-is, s umata, deg uḥric wis sin. Yebda uḥric wis sin s uswir-nni n uḥric amezwaru, acu kan tura d tarbaɛt n CSC i yesḥersen taswiɛt ɣef tarbaɛt n JSK, d nutni i yesɛan lebɣi ugar ilmeẓyen n leqbayel. S wakka, dɣa, i ssawḍen ad d-awin iswi-nsen amezwaru. Syin, yeldi ubrid ɣer sdat, qqlen yimyurar n CSC d nutni i isedduyen timlilit akken i asen-yehwa armi i d-rnan iswi-nniḍen sdat Abdat i yellan yettferriǧ deg yumyurar n CSC mi yettheggi ad yewwet ddabex-nni. Iswi wis sin i yeǧǧan ad terbeḥ tarbaɛt n CSC s 2 ɣer 1. Akken yebɣu yili lḥal, tɛedda temlilit deg tegnit igerrzen, mebla ma yella-d kra n cwal daxel n unnar. Acu kan, xas yella lebɣi ɣer yimyurar n tarbaɛt n yilmeẓyen n JSK, meɛna ur zmiren ara ad d-fken nnig wayen sɛan : aswir-nsen yewweḍ tilisa. S yimyurar am wigi, ha-t-an ad d-yuɣal wugur-nni n yilindi. Beddlen yimḍebbren, ttuxellasen yimyurar, yeččur-d unnar n umezwaru n unbir n Tizi Uzzu s yimferǧen, meɛna ur ibeddel kra ɣer yimyuraren, ur zmiren ara ad rebḥen deg Tizi uzzu. Ihi, akken i as-qqaren ‘’Tissirt mi ara tt-taɣ deg ryac, ur d as-d-xedmen yiɣuraf’’.
Hocine Moula