Ur telli teshel taluft n waman ɣef yimezdaɣ n Ayt Smaɛel, deg usamar n Bgayet, akuden-a ineggura. Ma yella deg unebdu ugur ameqqran, i iɛummen ɣef wat tɣiwant merra, d tuqin n waman deg tberninin n yixxamen, deg lawan-a n tewwura n tegrest, sɛan kra ugur akked tezdeg n waman i asen-d-yettawḍen. Snat n tuddar ar tura ideg i d-iban uɣilif-a n wammus deg uẓeṭṭa n ubḍaw n waman, neɣ deg yiqadusen: ti d Ayt Tɛisiwt d Tala Ɛṭa. Dɣa deg umedya n Ayt Tɛisiwt, ugar n useggas tura segmi ḥebsen kra n yimezdaɣ-is tissit n waman n tbernint. Nnig yiɣersiwen d yilefḍan i yettwawfen deg uxemmal ameqqran n waman, iban-d xesren yakk yiqadusen i d-yettawin aman armi ddeqs seg-sen yerka yerkukki. Ulamma ɛerḍen deg yiwen n wakud yimḍebbren n tɣiwant, ad bnun axemmal d amaynut iɣer rran taɣbalut, mazal luɣen waman i ččarayen wat uxxam. Dɣa, ḥala i usired d usizdeg n uxxam i ten-sseqdacen, wamma wid n tissit ttagmen-ten-id seg taliwin. « Atan tufa-aɣ-d tegrest-nniḍen s waman ur nezmir ad nesew deg uxxam-nneɣ. Nessaram ad yili uɛiwed n yiqadusen, d anezgum amezwar n yimḍebbren n tɣiwant-nneɣ ». D awal n yiwet n tmeṭṭut seg Ayt Tɛisiwt. Ilaq ad d-nini aṭas i yellan d amihi ɣef tezmert n umdan, d tezmert n tuddar s umata, mi ara yilin umsen waman n tbernint. Ma ur d-snulfan albaɛḍ n waṭṭanen iweɛren, zemren ad ilin deffir n usemmem i izemren ad ineq tikwal. Am wakken i d-yeḍra waya deg waṭas n temnaḍin n tmurt n yizwawen, amedya n Meqla deg Tizi Uzzu taggara-a kan.
M. K.