Mebɛed awal i d-yeffɣen, sya u sya, ɣef yiɛeggalen n Usqamu aɣerfan aɣelnaw i yugin ad qeblen asuter-nni n ukabar PT, i yeṭṭalaben anegmu n tmaziɣt akked uselmed-is deg yal tama tmaurt, aṭas i iɣaḍ lḥal, ladɣa inelmaden n yal aḥric n leqraya. Anec-a, yeglan-d s tnekra n tmesbaniyin deg waṭas n tɣiwanin n tmurt n leqbayel. Ṭṭaqa n tmesbaniyin-agi, d inelmaden n tesnawiyin i tent-id-iheggan, akken ad sbegnen lɣiḍ-nsen mgal rray-agi. Xas ulamma ttemxallafent tenfaliyin gar : “Ma ulac tamaziɣt ulac, ulac, ulac” , “Tamaziɣt la d-tessawal, rret-as awal” , “Mačči di ssuq i tt-ufiɣ, laṣel-iw d amaziɣ” , meɛna iswi d yiwen. Deg yal tikkelt, inelmaden ttessburruyen senjaq n yimaziɣen di tufɣiwin-nsen imi d azamul n timeɣnest ɣef tutlayt d yidles. Bdant-d temesbaniyin si lwilaya n Bgayet, bbaɛzaqent di Tizi Uzz , Tuviret syin di Tbatent akked di Stif. Ula d Agezdu n tutlayt d yidles Amaziɣ n Tizi Uzzu, yessawel-d i yiwet n tmesbanit i wass-a n letnayen 11-12-2017 ara yebdun seg tesdawit n Ḥesnawa. Ma yella d tasdawit n Bgayet, nettat tekcem, yakan, deg wass-is wis 6 n usunded . Ad d-nesmekti kan, d akken Asqamu unnig n timmuzɣ yewwet-d s leqseḥ deg yisallen-agi i d-yeffɣen ɣef tmaziɣt u yenna-d d asluɣu n teswiɛt i yebɣa baba-is.
S.Y.