Segmi kan i yuzzel wawal deg uzetta n FB γef tedyant yerzan aselmed n tmaziγt, anda iɛeggalen n tejmaɛt taγerfant taγelnawt gguman ad ddun deg wawal n ukabar n yixeddamen anda yessuter d akken tamaziγt ad tettuselmed di twilayin imerra yerna mebla ma xtaren-tt yinelmaden.
D ayen yesserfan mačči d kra isdawayen ukkud yinelmaden ama n tesnawiyin neγ n yiγerbazen ilemmasen. D timesbaniyin i inedhen di yal tamnadt, iberdan ɛemren, iγerbazen xlan, tiseddawiyin ikcem-itent uhetwir. S ya γer da, ad nsel d akken iγallen n laman ur fkin ara ttriḥ i wid ara yelḥun, maca mebla ma yella-d kra n lḥers. D acu kan, Tubiret, yiwet seg twilayin yettilin di ttiɛad, tezga tettxellis tabzert ugar n tiyad. Acimi ? Mi kkren yinelmaden n tesdawit Akli Mohand Oulhadj i wakken ad xedmen tamesbanit ass n letnayen yezrin, zzin-d yiγallen n laman i tesdawit, ur gin ara abrid n tuffγa i yinelmaden i wakken ad lḥun deg temdint. Yekker lhem d ameqqran, tiyita si yal tama : isdawayen s yizra d twedcin, imsulta s llakrimujan. Ayen yekka wass, lhem ur yeḥbis. Azekka-nni, tella-d tikli, mebla lexsara neγ taruẓi, ddan deg waṭas yid-sen. D acu kan, akken kan i d-uγalen yimesbaniyen γer tesdawit, mmuggren-ten kra n yiɛeggalen n tuddsa n yisdawayen s yiwet n tewlaft n uselway Boumediène. D ayen yesserfan imesbaniyen, i yekksen tteswira-a. Dγa din i yendeh umennuγ almi llan ddeqs n yimejraḥ. Ass n larebɛa, imi yuzzel wawal belli d wid ur neqqar ara deg tesdawit i d-yusan d imɛiwan i wid yellan mgal tamaziγt, aṭas n yilmeẓyen i d-ikecmen Tubiret deg yiwet n tikli tameqqrant, anda i tella ula d taruẓi, almi wwḍen ula γer yiwen n uγaram i cukken deg-s i llan wid yewwten isdawayen imesbaniyen. Da, d abrid n cwal gar sin n yigduden : Leqbayel d wid ur nettmeslay tamaziγt. Maca, acu yessawḍen tamsalt n uselmed n tmaziγt γer gar yimdanen ? Taluft iwulem kan ad tezdi adabu d yimdanen yettnaγen γef tutlayt-a, mebla ma yella-d yimenγi gar yigduden. Atas n yimdanen ass-a i yessawalen γer lehna, γer lemḥadra, imi times ma tecɛel gar yimdanen d tiwaγiwin kan ara d-tesseggri. I wakken ur yettnerni ara lhem, tanmehla n tesdawit teṭṭef rray n umdal n tewwura n tesdawit, ahat ad yeffeγ reffu isdawiyen, mi akken aṭas n yimdanen ttnadin tifrat i taluft.
M. Smail