I lmend n usmekti n tmesbaniyin n 11 duǧamber 1960 i xedmen Yizzayiryen yettidiren deg tmurt n Fransa imir-nni, d wazal i sɛant deg umezruy n tmurt n Lezzayer, ttwasuddsen-d kra n leqdicat idelsanen swayes i d-smektan timesbaniyin-agi iɣef ɛeddan 57 n yiseggasen fell-asent, maca mazal ccfawat n ttraḍ deg wallaɣen n yimdanen. Yella-d leqdica-agi deg Uxxam n yidles Mulud At Mεemmer n Tizi Uzzu, ass-nni n lḥed 10 deg waggur-agi n duǧamber ideg nella. Deg tzeqqa n temsikniyin, tella-d temsikent akked tezrigin n yidlisen yerzan amezruy, tella-d diɣ temsikent n yimagraden n tɣamsa, tugniwin,…atg. Ma deg tzeqqa tameẓyant n umezgun, ɣef 13h30 d afella, yella-d usenɛet n yiwen n usaru n ṭtrad, s umata u ɣef wayen swayes i d-glant temsbaninyin-agi 11 duǧamber 1960 s wuzig. Syin akin d asarag, ddima, ɣef tmesnabniyin-agi, sɣur Mass Abdel Madjid Chikhi s yisem-is d anemhal n yiɣebran (archives), am wakken daɣen i d-llant tnagiyin n Mass Meddou Med Said, s yisem-is d aneɣmas, yerrna yedder tallit-nni. Ma d ass-nni n letnayen 11/12/2017, deg tsebḥit n was, tella-d tirza n yinelmaden d yilmeẓyen ɣer Usalay n Abane Ramdane. Am wakken daɣen i d-tella, deg tzeqqa n temsikniyin, yiwet n temsikent akked tezrigin n yidlisen yerzan amezruy, tella-d diɣ temsikent n yimagraden n tɣamsa, tugniwin,…atg. Ma deg tzeqqa tameẓyant n umezgun n Uxxam n yidles ɣef 10h00 n ssbeḥ, yella-d usenɛet n usaru-nni “Leǧruḥ, gar usmekti d tatut”, n umsuffeɣ Larbi Kamel. Syin ɣer-s ɣef 14h30 n tmeddit deg tzeqqa n tmeɣriwin, ddima n Uxxam n yidles, tella-d tmeɣra d tajmilt i twaculin tigrawliwin, s lemɛawna n Tuddsa taɣelnawt n yimjuḥad d warraw n ccuhada akked yessi-s n tuǧǧal n yimjuhad n lwilaya n Tizi Uzzu, tella-d diɣ tɣuri n yisefra n ṭtrad akked yicewwiqen n lgarra-nni. Ikemmel leqdic-agi deg Uxxam n umezgun amniḍan Kateb Yacine, ɣef 14h00 n tmeddit, s wurar n yiwet n tceqquft n umezgun “Le foehn” neɣ abujad, yura Mulud Mɛemmri, i d-yessuffeɣ Uxxam n umezgun Kateb Yacine. Am wakken daɣen i d-tella deg tazeqqa n yisaragen Wammas adelsan Krim Belkacem n Azazga, ɣef 14h00 n tmeddit, urar n tmezgunt-nni “Amsruf ur ntettu”, n umsuffeɣ Abederrhmane Houche. Ad nesmekti kan s yidisan i d-isuddsen leqdic-a, gar-asen: Tanmehla n yidles n lwilaya n Tizi Uzzu, Axxam n yidles Mulud At Mεmmer n temdint-agi d Tneḍfart-is n Azazga, Axxam n umezgun amniḍan Kateb Yacine, tazeqqa n ssinima n Tizi Uzzu, s tallelt n waṭas n yimεiwnen yecban: Tasqamut n leqdicat idelsan d wid n tẓuri, Tanmehla n yimjuhad, Asalay amniḍan n Tizi Uzzu…atg.
Ghani Amazigh