Tameddit n wass-nni n lǧemɛa 15 duǧamber 2017, ɣef lewhi n 14h00 deg tzeqqa n yisihren (spectacles) n Uxxam n umezgun amniḍan Kateb Yacine, tella-d wurar n tceqquft n umezgun “Tacbaylit” i wumi i d-yexdem Mohand Ouyahia taserwest (addaptation) ɣer teqbaylit. D taceqquft i yerra ɣef usayes Toufik Kaoudji, yewwin arraz wis tlata n temsizzelt n umezgun, i d-yettilin yal aseggas deg tazwara n waggur n duǧamber. Tella s yisem-is anasli “La jarre de Lugui” n Pierre Andello, tettwaru s tefransist, syin netta yerra-tt-id ɣer teqbaylit s uzwel-agi “Tacbaylit”. Syin akkin tiddukkla tadelsant “Uqataan Oukaoudj” n taddart n Akaoudj deg tɣiwant n Ait Aissa Mimoun, rran-tt ɣef usayes s lmendad n Mass Toufik Kaoudji. Uraren-d taceqquft-agi n 55 n ddqayeq, 11 n yiwudam n umezgun, gar-asen 3 n tullas akked 8 n warrac. Dɣa d Toufik Kaoudji i d awdem agejdan deg tceqquft-agi, yurar-d s yisem n Djeddi Ibrahim, ma d Hamid Rabah yurar s yisem n Ali n Dulu, ma Tédjani Yacine ilɛeb-d d anejbar. Kaoudji Mohand yeṭṭef amkan n le vizir am wakken i yeṭṭef Slimani Ahmed amḍiq n win i xeddmen timedlin. Ma d awdem Sellah Mazigh, ilɛeb-d d Wejṭiti ma d ameddakkel-is Amrouche Yacine i yeṭṭfen amkan n unzerfu (avocat) deg tceqquft-agi i ḥedren waṭas n lɣaci ulamma d taggara n ddurt yerna d lǧemɛa tameddit. Ma d tlata-nni n tullas-nniḍen, urarent-d akka, Zitouni Samia deg umkan n Tajilvant, Radi Dihia deg umḍiq n Smina n Tazart akked Henni Yasmina i d-yuraren deg ddur n Hlima n Tala. D tacegguft i d-yewwin awal ɣef tmetti taqbaylit d wamek ttidiren deg-s yimezdaɣ-is, ladɣa deg lawan-agi n uzemmur d wayen akk icudden ɣur-s. Tcudd daɣen lwelha n yimferǧen ɣer tecbaylit-nni n zzit, yettuneḥsaben d azamul n lɣella n zzit n uzemmur…atg. Ula d azekka-in n ssebt, tameddit n wass ɣef lewhi n 14h00, ddima deg tzeqqa n yisihren n Uxxam n umezgun amniḍan Kateb Yacine, yella-d wurar n tcegguft n umezgun “La Peur in transit”, yura Omar Fetmouche, syin terra-tt Massa Ziemze Lydia Beate ɣef usayes. Taceqquft-agi, tekcem deg wahil n tfaska tagraɣlant n umezgun i d-yettilin yal aseggas deg lwilaya n Bgayet. D afaris (produit) n snat n tmura Lezzayer akked Lalman, tella-d s yisem n ccaruka gar Tfaska tagraɣlant n umezgun n Bgayet (FITB) n tmurt n Lezzayer akked Useddu (GOETHE) n tmurt n Lalman.
A. A.