Ulac yakk ccekk d akken tuget n wid iḥemmlen urar n ccatranj, ur zgilen ayen i d-yeḍran d ineḍruyen ddurt-a iɛeddan, ama d talɣuɣa n tefriqt n yimecṭaḥ, talɣuɣa n umaḍal deg tmurt n Saɛudiya neɣ d tin n uẓeṭṭa n internet i d-tettheggi chess. com. Deg tmurt-a, ihi i d-nebder, i temmug telɣuɣa n umaḍal n ccatranj King Salman. gar yimuraren akk ifazzen deg umaḍal d kra seg wid iɛeddan 1 400 deg usismel elo. Ahat xussen kan kraḍ n Yimarikanen; am Hikaru Nakamura, i yugin taggara-a turart deg Saɛudiya. Akked Tukranit talɣuɣt n umaḍal Anna Muzychuk , seg tama n tlawin, i yugin ula d nettat ad truḥ ɣef kra n ssebbat i d-tenna rzant tilelli-ines nettat. Teɣzi n tberza-a, aṭas i d-yellan d tiram yelhan, s uswir aɛlayan daɣen. Am wakken ddeqs n yimɛadalen i yettwajerrḍen. Deg temsizzelt-a, ur yebdi ara akken ilaq ulɣuɣ n umaḍal Magnus Karlsen deg tiram tiruradin. Maca yella yesra kan i ukuẓ n wussan akken ad d-yuɣal deg blitz i uswir swayes yettwassen. Armi dɣa seg mraw n tiram (parties), yerna ṭam iga amɛadal di snat. S waya yerra-d azwel-is n ulɣuɣ deg blitz. Deg talɣuɣa n tlawin, d Nana Dzagnidz i d-iḥellan azwel i useggas seld mi turar ula d nettat aṭas n tiram yelhan. Dɣa, yebda yettban-d mliḥ taggara-a ccatranj n tlawin deg umaḍal merra. Ma yella deg ssenf arurad, d Ahendiw Viswanathan Anand i d-iḥellan azwel n useggas 2017 seld mi yebda akken yessaram gedged. D awal ɣef talɣuɣa n Speed Chess Championship. i d-ijemɛen Anurviji Magnus Karlsen d Umarikan Hikaru Nakamura, d amezwaru-a i d-iḥellan daɣ azwel n useggas-a i tikkelt tis snat ta deffir ta, s ugemmuḍ n 18-9.
M. K.