Zik-nni, ḥekkun d akken tella yiwet n temɣart, yesɛan taɣadt, teqqim aggur n yennayer kamel, ur teksi ara aɣersiw-is imi, aseggas-nni, yexser lḥal mačči d izli : ageffur, adfel akked usemmiḍ, zgan deg wussan n waggur-nni. Asmi ifuk yennayer, tecreq-d tafukt, yeḍher-d lḥal. Teffeɣ-d temɣart-nni akked taɣadt-is, tekker tetmesxir ɣef yennayer, tenna-as : « Xemsa deg wallen-ik ! Tfukkeḍ, truḥeḍ, ur tesɛiḍ d acu i yi-txedmeḍ ! ». Akken i as-yesla yennayer, yezɛef, yerza ɣer furar, yenna-as: « Ttxil-k a ɛemmi Furar, rḍel-iyi yiwen wass deg wussan-ik, ad nɣeɣ tamɣart-agi, aqemmuc n lɛar ! ». Yerḍel-as Furar yiwen wass deg wussan-is. Ciṭ kan akka, teččur-d tegnewt s usigna, la tberreq, la treɛɛed, tebda-d lehwa syin d adfel, yettzuffu-d waḍu. Tamɣart-nni, di berra, teqqur s usemmiḍ, temmut, nettat d taɣadt-is. Seg wass-nni, yettusemma wass aneggaru n yennayer d amerḍil n temɣarin. Xas ulamma, ḥekkun-d akk ɣef temɣart-a akked waggur n yennayer, acu kan yal tamnadt n tmazɣa, amek i d-tettawi taqsidt-a. Llan wid i d-yeqqaren, yiwen wass kan i d-yerḍel yennayer ɣer furar. Llan wiyaḍ,qqaren-dyemsex usemmid tamɣart, dɣa, yerra-tt d asebdad. Yella anda i d-ttilin sebɛa n wussan n umerḍil. Seg wakken terkeb tugdi ifellaḥen seg teqsidt-agi, zik-nni, uɣalen ur ssufuɣen ara lmal-nsen akk aggur n yennayer. I wakken ad sdergen tugdi-agi,qqaren-as, nttaǧǧa lmal deg udaynin imi sseḥmuyen axxam deg waggur n yennayer, i isemmḍen ugar n wiyaḍ deg useggas. Ɣef wanect-a, diɣ, i d-snulfan ssuk deg yal tamnadt,ɣef wakken i d-ḥekkun. Seg tmurt Merruk akked Libya, ssexlaɛen s temɣart-agi igerdan i yettagin ad ččen akken iwata imensi n yennayer, qqaren-asen : « Ad teččem imensi-nwen, neɣ ad d-tas temɣart, ad teldi akerciw-nwen, ad t-teččar s walim ».
S tgemmi n tmaziɣt