Seld timerna deg ssumat n lisans d lmazut, rray i ddmen imḍebbren n tmurt, yuttujarden deg usaḍuf n tedrimt n 2018, sutren wid ixeddmen deg uḥric-agi n usiweḍ deg tneɣlaft n usiweḍ ɣef tmarna deg ssuma n usiweḍ. Ayen, dɣa, i d-yeqbel uneɣlaf i d-yefka ttesriḥ i tmerna n ssumat s wazal 5 DA i wid yessawaḍen s lkiran deg tlemmast n temdinin. Ma wid yettawin gar yigerzuyen, ad yili unerni s wazal n 10 ɣer 15% ɣef ssumat tiqdimin. Deg ussan-agi ineggura, bdant ssumat deg tmerna deg waṭas n temḍiqin d tɣiwanin n ugerzu n Tizi-Uzzu, gar tɣiwanin teɛna tmarna, ad naf taɣiwant n Lemɛatqa d wid yessawaḍen seg tɣiwant n Lemɛatqa ɣer tɣiwant n Souk El Ténine, i iqesden ad rnun i ssuma n usiweḍ s wazal n 5 DA ( 15 DA= 20 DA), aya daɣen yeɛna tamḍiqt n Betrouna d wid yettawin seg Betrouna ɣer temdint n Tizi-Uzzu, timerna tellad s wazal n 5 DA. Deg Tɣiwant n Friḥa d Uɣrib, rnan i ssuma n usiweḍ s wazal n 10 DA. Timerna-agi n ssuma n usiweḍ dayen i d-yeglan s usḥissef meqqren n yimdanen, aladɣa wid iteddun deg tawilat n usiweḍ yemxalafen, imi d tikelt tis snat deg sin n yiseggasen i nnernant ssumat n usiweḍ deg tmurt n Lezzayer.
Ali Zalouk