Mebɛed tazrigt tamezwarut n Tucbiḥt n Micli i yeḍran ilindi, ha-t-an ad teḍru tezrigt tis snat deg ussan-agi i d-iteddun. I lmend n waya, yebda ujerred d win ass-nni n 20 deg yennayer 2018, ad yeddu alamma d ass n 20 deg furar2018. Ma yella d afran n tucbiḥt, ha-t-an ad yili deg wass agraɣlan n tmeṭṭut 8 deg meɣres 2018. I tid teɛna temsalt, ad ruḥent ɣer uzaduɣ n yilmeẓyen Ǧerǧer n Ɛin El Ḥemmam i wakken ad jerrdent iman-nsent. Ilaq ad ilint gar 16 d 25 n yiseggasen deg leɛmer-nsent , daɣen ad ilint, zedɣent di tɣiwant n Micli. Ma ɣef wamek ara d-yili ufran n tucbiḥt, ḍeffren yimsuddsen ilugan n temsizzelt i yettilin deg umadal, yecban tamussni igerrzen deg taɣulin yemxallafen, cbaḥa n wudem d tfekka , aseḍṣu yelhan, taqcict, ilaq ad tili tesɛa 1,65 m neɣ ugar di teɣzi. Ilaq, daɣen, ad tili ur texdim ara yakan acelleḥ n tujjya i lmend n cbaḥa, akken daɣen ilaq ad tissin ad temmeslay akken iwata imi ad d-tessbeggen tameṭṭut n Micli d tmeṭṭut taqbaylit s umata. Akken i d aɣ-d-iberreḥ yiwen seg yimḍebbren n temsizzelt, d akken ad ilin yinaẓuren ara yecnun ass n ufran n tucbiḥt n Micli. I usmekti kan, di tezrigt tamezwarut, isem n tucbiḥt yuɣal i Massa Ait Ali Mélissa .
S.Yamani