Thegga-d, ddurt-a yezrin, Tdukkla Aweqqas Addal d Umzel (Loisir) tuffɣa-s tis 39 seg tɣiwant n Ayt Smaɛel ɣer tin n Tizi n Berber, ɣef teɣzi n 25 n yikilumitren. Send ad teqleɛ terbaɛt tikli, iga-asen-d uselway n tɣiwant n Ayt Smaɛel, Mass Sadeq Rebbaɛi, ttawil n ufurgu i ten-yessawḍen armi d taddart n Tizi Lexmis. Dɣa, seg rreḥba n yideflawen, azal n 20 n yimdanen, gar-asen tameṭṭut, i yeṭṭfen iberdan n yidurar qbala ɣer uzrar-nniḍen n udrar deg tɣiwant tanaragt (taǧaret) n Tizi n Berber. Ulamma inuḥ usemmiḍ, ihewwel ucelliḍ udmawen, dman-as i waya wid ibeggsen i ttiɛad-a , ẓran mačči d ayen ara ten-yesḥebsen. Deffir umwelleh-nsen, ṭṭafaren yimekkiyen abrid, rennun sbennayen timuɣliwin icebḥen i ẓerrent wallen-nsen deg tegrest taɛeryant. D ayen i ten-yeǧǧan ur sbiren ɣef tukksa n tsewwarin-nsen akken ad sḥebsen akud kra n teswiɛt, ad ṭṭfen i lebda aktayen n tegnatin-nni ur yezmir yiwen ad yettu. Ulamma weɛren yiberdan-nni iɛlayanen, tikwal d imihanen i tikli, ur ḥulfan yiḥewwasen ala s lḥamu n tegnit d ccbaḥa n tmuɣliwin tixlafin. Imi ula d annecraḥ ttakken-as amḍiq seg tikkelt ɣer tayeḍ. Rnu daɣen idrizen-nsen i d-ixeddmen unuɣen icebḥen ɣef udfel amellal, send ad kecmen tilisa n Tizi n Berber. Mi ttqaraben ɣer tansa i neyycen, kfan tikli ɣef udfel azedgan, uɣalen srusuyen iḍarren ɣef tzegzewt. Armi, gar ɛeyyu d laẓ, ufan iman-nsen ilaq ad sgunfun, ad d-rren nnfu swayes zemren ad ḍerrḍen ad kemmlen. Ihi, lawan n yimekli, fernen yiwen n wadeg gar yiẓra imeqqranen akken ad ččaren iɛebbaḍ. Ad d-sewwen ula d tacrift imi yakk ttawil heggan-t si tazwara i usiɣi n tmes. Mi kemmlen tikli s uẓuɣer n yiḍarren, wwḍen ɣer wanda ara ten-yeddem ufurgu-nniḍen ɣer Aweqqas tikkelt-a, imi tuffɣa-nsen din tekfa. Maca si tura tḥar terbaɛt ɣef wazemz n tuffɣa i d-iteddun.
M. K.