Ur ttun ara medden amek ddren anebdu yezrin, d wacḥal sɛeddan deg-s ɣef tmentilt n teqseḥ n lḥamu-s i nezmer ad d-nini yugar tilisa n ssber. D ussan iweɛren nezzeh i asen-d-tewwi tsemhuyt-nni, imi tagrest i d-yusan send-is ur texdim akken ilaq seg tama n tɣelyawt n yigeffuren i itekksen fad i wakal. Dɣa, ma nuɣal-d ɣer useggas-a, ma nemmeslay-d ɣef ccetwa-a ideg nella, ad d-yemmekti kan yiwen tin n yilindi i tt-yettcabin deg wudem i d-tefka i ugama d twennaḍt. Mačči d tumert i d-tga tegrest-a, ma nmuqel ɣer sin n wayyuren-is imezwura, i yemmuten war ma fkan-d neɣ ǧǧan-d ayen yetturaǧun seg-sen. Maca, ẓran merra lɣaci d akken ala deg kra n wussan i d-tesseɣli tegnawt lehwa. Wammag ussan-nniḍen, sɛeddan-ten deg yiṭṭij, ɣas tikwal ttilin usegna d tagut, d waḍu i d-irennun taɣart s uhubbu-ines. Ass-a, terna tugdi deg wulawen n wid i d-yessugunen amek ara yili unebdu i d-yettaẓen, imi ɣas aql-aɣ deg wussan ineggura n ccetwa-a, maca igeffuren i d-yewwten neɣ ara d-yewwten ahat, ur sserwan, ur sserwayen akal yeqquren armi dayen. Ladɣa imi igemmaḍ n tɣarit-nni ttkemmilen timḍerrit i d-ttawin i ugama d umdan. Znazel, kkatent, aman xussen, ṭṭjur d yimɣan ttmettaten. Aṭas n ssebbat i yellan deffir waddad n tegnawt ur nessefraḥ. Gar-asent, nezmer ad d-nebder lḥamu n yigenni-nni ur ǧǧin ddexxanat n luzinat, times yettwacɛalen d tkerrusin, ad yeṭṭef tasmuḍi, ad d-yebru i waman s ṭṭaqa. Ad yeqqim umdan deg umihi ɣef tmurt d ugama yuḍnen seg wayen akka iḍerrun, ɣas ma yekki s umur ameqqran deg usnerni n waṭṭan-nni.
Kaissa Khalifi