Smail At Rabeh, d mmi-s n Larebɛa n At Yiraten , yekecmen di taɣult n ufessel d lexyaḍa. Yessawḍen i wakken ad yessufeɣ taqendurt n leqbayel ɣer waṭas n tmura n umaḍal. Deg tdiwennit-a, yules-d i kra n lesrar-is.
Aɣmis n Yimaziɣen : Amek i tebdiḍ amecwar-ik di taɣult-a n llebsa ?
Ait Rabah Smail : tella yemma d taxeggadt, dɣa ttwaliɣ akk amek i txeddem, yettaɛjab-iyi-d uxeddim-nni. Mi ara tettxiḍi, ḥemmleɣ ad qqimeɣ yid-s akken ad lemdeɣ kra. Dɣa s tidet aṭas i d-refdaɣ. Asmi lliɣ meẓẓiyeɣ, xedmeɣ asuneɣ d tesreɣta (la sculpture ) ayen akk yeɛnan taẓuri s umata. Asmi sɛiɣ 11 n yiseggasen, yessekcem-iyi baba ɣer Uxxam n yidles n Tizi uzzu akken ad lemdeɣ asuneɣ akked tesreɣta. Imir-n, ḥareɣ akken ad kecmeɣ di taɣult n lexyaḍa. Nekk deg wallaɣ-iw, tefra d wagi i d abrid-iw. Dɣa, bdiɣ ttxiḍiɣ lebsa tazayrit tamaziɣt. Xedmeɣ-d i tikkelt tamezwarut Karaku amazigh , syin Qaftan amaziɣ daɣen.
Amek i d-tettlal tqendurt deg wallaɣ-ik ?
Di tezwara, ad tebdu d tikti , syin ttaɛraḍaɣ akken ad jemɛeɣ kra tnalitin sya w sya. Dɣa, aql-i la ttheggiɣ-d deg ussan-agi, ad xedmeɣ taggayt (collection) n tqendyar n temnadt n Ɛennaba. La ttnadiɣ amek ara as-skecmeɣ tanalitin timaynutin, akken ad as-teɛjeb i tmeṭṭut mi ara tt-tels. Ufiɣ-d tamurt n Leqbayel, tesɛa izumal am widak-nni i nettwali ɣef tiɣawsiwin n talext, dɣa syagi i d-beddunt. Nekk snarnayeɣ-tent, d tagi i d tikti tagejdant. Rniɣ nudaɣ kter, ur bɣiɣ ara ad qqimeɣ kan di temnadt n Leqbayel, maca nudaɣ ayen akk i yeɛnan Imaziɣen, imi iswi-w d taqendurt n yimaziɣen, i wakken ad d-tban deg umaḍal merra, mačči kan dagi ɣur-nneɣ. Amedya, taggayt n useggas-a, ad xedmeɣ taqendurt anda ara tili tnalit n Itergiyen : sxedmeɣ kraḍ n tiɣmiwin, i sexdamen Itergiyen di lbus-nsen amensay.
Amek tessawḍed ad tessufɣeḍ taqendurt n leqbayel ɣer tmura ?
Gar yiswiyen-iw dɣa wagi : ad suffɣeɣ taqendurt n leqbayel ɣer tmura tibarraniyen akken ad tettwassen, akken ad zuzreɣ idles-nneɣ , imi mi ara walin taqendurt n leqbayel, steqsayen ɣef ugdud-agi, dɣa din ara tettwassen tmurt-nneɣ.
Ma yella nniɣ-ak-d tameṭṭut taqbaylit…
Tameṭṭut taqbaylit d nettat i yesbedden axxam-is, temxallaf mliḥ ɣef tlawin n umaḍal merra s nnif-is d lḥerma-s. Si tama-agi n lexyaḍa, zik ulac tameṭṭut ur nessin ara lexyaḍa, d nettat i d lsas n uxxam. Win yesɛan tameṭṭut taqbaylit, ur yettugad ara, imi yella fell-as lettkal
D acu-ten yisenfaren n Smaɛil deg wayen yeɛnan taqendurt n Leqbayel ?
Aql-i la ttheggiɣ yiwet n tzeqqa n lexyaḍa tamensayt dagi di Larebɛa n At Yiraten, anda ara xedmen kan amensay.
Yamani Souhila