Ssebt-nni iɛeddan, 3 deg waggur-agi n meɣres, i d-tella tesfugla n taggara n tezrigt tis 12 n warraz Mulud Mɛemmeri, i d-tettheggi yal aseggas tiddukkla n yiselmaden n tmaziɣt n lwilaya n Tizi Uzzu. Deg tzeqqa tameqqrant n uxxam n yidles Mulud Mɛemmeri i d-tella tmeɣra-agi n tukci n warrazen i yinelmaden i d-yufraren. Leqdic adelsan s wazal-is, ideg ferqen azal n 30 n warrazen i yinelmaden n 3 n yiswiren n ulmud. Dɣa deg uswir n ulmud amenzu fkan 10 n warrazen i yinelmaden n yiɣerbazen imenza, 10 n warrazen-nniḍen fkan-ten i yinelmaden n uswir wis sin (aɣerbaz alemmas), am wakken daɣen i fkan 10 wiyaḍ i yinelmaden n tesnawiyin. Ma d amḥezwar n yinelmaden, yella-d akka: deg temssizelt n tzabut n yiɣerbazen imenza d Damou Lisa, n uɣerbaz amezwaru Remous Saada n Boughni, i d-yufranen deg umḍiq amenzu. Ma deg temssizelt n tzabut n yiɣerbazen ilemmasen (CEM) d Sekouane Amel, n uɣerbaz alemmas Akli Amar n Bouzeguène, i yewwin amkan amezwaru. Ma deg temsizzelt n ufares s tira, i d-yellan i lmend n yinelmaden n tesnawit, d Hikoune Dehbia n tesnawit Abane Remdane n temdit n Tizi Uzzu, i d-iḥellan arraz amenzu. Am wakken daɣen i tt-gan yiɛeggalen n tiddukkla-agi, d tajmilt i 23 n yiselmaden n tmaziɣt lwilaya Tizi Uzzu i d-tessuffeɣ tannant tamezwarut n 1995, iwumi qqaren tannant n Mulud Mɛemmeri, i isekecmen tamaziɣt s aɣerbaz azzayri. Iselmaden-agi yeffɣen ɣer tesɣimt, terra-asen tiddukkla-agi tajmilt s yisefkan (cadeaux) i lmend n wayen i d-fkan i tmaziɣt. Ɣer taggara, ad nesmekti belli leqdic-agi tettheggi-t-id yal aseggas tiddukkla n yiselmaden n tmaziɣt s talellt n tenmehla n usegmi akked tin n yidles n lwilaya n Tizi Uzzu.
Ghani Amazigh