Nwala amek iga iḍelli waddad n tutlayt taqbaylit, neẓra amek i d-yuɣal ass-a. Segmi tuɣal tmaziɣt d tutlayt tunsibt, aṭas i iwalan tefsi tkerrist i ten-yeqqnen akken ad sqedcen tutlayt-nsen. Deg tmurt n Leqbayel akka tura, taqbaylit, reffden-tt tarwa-s s lebɣi akken ad tidir nettat, ad tessider ula d nnekwa d lasel i yeqqnen ɣer ɣur-s. Dɣa, ugar n yiḥricen ideg tettwasseqdec merra, am yidlisen, d usekcem-is deg Internet, tutlayt, tger asurif-nniḍen deg uḥric d amaynut i yellan d aseqdec-ines ula deg n tɣiwanin d tdeblin n tmurt. Ma nefka-d amedya, ad d-nebder taɣiwant n Ayt Smaɛel i simmal tettak amkan i usekkil amɛemri, simmal tettak tagnit, ama i yimezdaɣ n taddart, neɣ i wid i d-irezzun seg temnaḍin yemgaraden, i wakken ad izmiren, ad ɣren tamaziɣt-nsen i nnumen seg zik ur tt-ttwalin gar tutlayin i ten-yexḍan. Aya dɣa, yella-d seld mi tebda deg wakud iɛeddan asufeɣ n wulɣuyen yemgaraden s teqbaylit, terna taggara-a tettsemmi yis-s iɣerbazen d yiberdan, tettaru-tt daɣen deg yiẓekwan. Skud ulac awezɣi deg wayen iwumu ssawḍen, imdebbren n tɣiwant n Ayt Smaɛel ur stehzan deg usnerni n tutlayt tayemmat i yellan gar yiswan-is. «Seg tazwara i nxemmem ad nesseqdec tamaziɣt deg lecɣal-nneɣ, acku nebɣa ad nesnam i ugdud tutlayt-is». I d-yenna uselway n tɣiwant n Ayt Smaɛel, Mass Sadeq Rebbaɛi. Ulamma aqeddic-a, yuɣ lḥal, yessutur-d win yettgerrizen tira n tamaziɣt i wakken ur d-teddunt ara tucḍiwin, maca s tallelt n widak iḥemmlen tutlayt-nsen, ɣas ur ixeddamen daxel tɣiwant, iferru wugur-nni. Acu kan aɣilif-a n yixeddamen n tɣiwanin i d-ibanen, ur ssinen ara ad arun s tmaziɣt, ayen yeǧǧan aṭas n yimḍebbren n tɣiwanin-nni, ad ssuturen asekcem n kra n yiqeddacen, xersum yiwen, iɣef yezmer ad yili lettkal deg yimahilen i icudden ɣer teqbaylit d tira-s. Ad d-nesmekti kan d akken ula d ikaciyen (cachets) s tmaziɣtt, llan wid i ten-id-ixeddmen si tura. D ayen i yessemɣaren ugar asirem, i d-yesbegginen ssmamat n uzekka n tutlayt n Lmulud At Mɛemmer.
Kaiasa Khalifi